Home Justisa Adia Tan Julgamentu Richard Daschbach, La Justu ba Vitima Sira

Adia Tan Julgamentu Richard Daschbach, La Justu ba Vitima Sira

844
0
RD konversa ho jovem feto nain 2 iha TR. [Foto: Francisco JDA | 09.06.2021]

Tribunal desidi tiha ona adia julgamentu ba Kazu Topu Honis ne’ebe involve Richard Daschbach nudar arguido ba 5 Julho 2021. Ajensia Juridiku Sosial, JU,S sente la justu ho prosesu mak lao dadaun.

“Ba JU,S prosesu julgamentu hanesan lao dadaun ne’e la justu ba vitima sira. Oinsa mak juiz, prokurador no advogado ba vitima no vitima sira rasik bele marka prezensa iha tribunal Oecusse tanba sa arguido labele marka prezensa?”, Maria Agnes, sosio ida JU,S expresa ba UCA News (https://www.ucanews.com/amp/timor-leste-to-try-ex-priest-by-video-in-child-abuse-case/92790).

JU,S mos hatete katak bainhira tribunal adia bebeik ne’e signifika terus. Signifika matan-been. Besik tinan 3 ona hosi data rejistu denúnsia ba dala ikus. Audiénsia ajenda ba dala 3 ona. Kada vez sira hetan notifikasaun atu mai Tribunál, ne’e loke fali sira-nia kanek, sira hetan esperiensia dala ida tan terus ne’ebé sira hetan.

“Ne’e la justu. La justu ba vítima rasik, la justu ba sira-nia família”, Maria Agnes, Sosio ida hosi JU,S expresa ba Neon Metin via WhatsApp.

Ba JU,S maske iha situasaun covid, estadu emerjensia no serka sanitaria justisa tenke la’o nafatin. Dekretu Prezidente Estadu Emerjénsia reitera ida-ne’e ho momoos.

JU,S rekoinese katak iha duni difikuldade oin-oin atu halo movimentasaun, maibé ema hotu-hotu tenke hakruuk ba Tribunál nia notifikasaun no tenke prontu atu koopera ho justisa. Ne’e mak Estadu Direitu ne’ebé ita harii iha rai ida-ne’e ho raan no kosar-been.

“Mezmu ho difikuldade, Tribunál iha kapasidade atu haruka ninia juís no intérprete, Ministériu Públiku bele mós asegura prokuradór titulár kazu bele mai desloka iha Oecusse no ekipa JU,S mós bele. Aviaun semo dala 3 iha fulan-maiu, ró mós mai, maibé ekipa defesa hili atu la uza transporte sira-ne’e”, Maria Agnes hatutan.

Julgamentu ne’ebe adia bebeik, ba Diretora JSMP, Ana Paula Marcal, hatete iha entrevista via WhatsApp  katak ne’e hamenus konfiansa ba tribunal. Tan tribunal labele hakonu prinsipiu tribunal ida lalais, simplis no baratu.

“Julgamentu kuandu adia bebeik bele fo impaktu ba prova sira no hamenus konfiansa ba tribunal. Alende ne’e Lezada sira bele haluha faktu sira ne’ebe akontese no ema hotu bele lakon konfiansa ba tribunal tan justisa lao kleur. Alende ne’e fo mos impaktu ba prinsipiu julgamentu lalais, simplis no baratu. Laos deit ba kazu Topu Honis maibe mos ba kazu sira seluk”, Ana Paula Marcal esplika, 10/06.

Kazu Topu Honis mak nudar kazu pedofilia ne’ebe mosu ba publik dahuluk iha Timor- Leste no kazu ne’e involve eis-Padre Richard Dascbach hosi kongregasaun SVD nian. Ho rezultadu investigasaun Kongregasaun Dutrina ba Fe nian iha Vatikanu, Richard

Daschbach konfesa tiha ona katak nia sala, no Amo Papa Francisco hasai tiha ona Richard Dascbach nudar padre iha tinan 2018. Eis-Padre ne’e agora dadaun tuir hela prosesu justisa ho kondenasaun kazu pedofilia, pornografia labarik no violensia domestika.

Print Friendly, PDF & Email

LEAVE A REPLY

Please enter your comment!
Please enter your name here