Reportajen Silvino Freitas
Autoridade Protesaun Sivil (APC) nia stock foos tonelada 380 preparadu iha armajen movel Comoro hodi responde ba situasaun emergensia iha munisípiu, foos hirak ne’e hetan apoiu husi World Food Programe (WFP) maskí foos balun iha ona estragus maibé APC kontinua halo deskaregamentu ba munisípiu iha kada fulan 3.
Sekretáriu Estadu Protesaun Sivil (SEPC) Domingos Mariano Reis dehan, stock ready neebe prontu apoiu ba dazastre sira iha munisípiu bainhira akontese dezastre emediatamente responde iha oras 24 nia laran, nunee ema sei la kestiona APC nia servisu tanba ekipa ne’ebé preparadu atu fo apoiu, nune’e iha SEPC nia vizita ba iha diresaun nasionál resposta emerjensia hodi observa no superviziona sira nia stock ne’ebé iha.
“Ida nee mak ita foos ne’ebé prontu hela atu responde emerjensia ba teritorio nasionál, normalmente fulan tolu tolu sempre deskarega ba munisípiu sira ho 250 pakote aihan no laos aihan ai han mak foos ne’ebé stock ready 3 mill sakas ho nia pesu 25 kilograma 380 toneladas” dehan SEPC Domingos Mariano Reis iha Bombeirus Comoro, (20/01).
Nia dehan tan, foos hirak ne’e apoiu husi programa aihan mundial WFP ne’ebé parseiru APC nian nune’e iha tinan kotuk APC husu apoiu no sira konsege apoia foos hirak ne’e 3 mill ne’ebé antes nee tau iha armajen bebora depois muda mai fatin ne’e, nune’e mos APC iha armajen permanente rua ida iha Vikeke no ida iha Covalima nunee iha munisípiu 12 inklui RAEOA mos iha armajen kiik sira ne’ebé sempre halo deskarega iha kada fulan 3 ho 250 pakote tuir pedidu husi munisípiu sira.
“Foos ne’e 2024 nian ne’ebé nia prazu seida’uk iha iha saka kiik balun ne’ebé estragus tanba dalaruma laho ka bee, maibe maioria di’ak hela ne’ebé prontu hela atu apoia vitíma sira ne’ebé kauza dezastre ne’e” dehan SEPC Domingos.
Nia konklui, sira iha ona planu atu halo armajen nasional ida ba responde emerjensia ne’ebé sei hetan tulun husi parseiru balun nune’e sira survey hela rai ka fatin balun iha Likisá, tanba armajen ne’e importante tebes tanba ne’e SEPC iha ona parseiru balun ne’ebé aprosima ba sira atu implementa polítika armajen nasionál.
