Reportajen Filomena da Conceição
Tuir dadus ne’ebé maka Institutu Defeza ba Direitu Labarik( INDDICA), rekolla hahú 2019 to’o mai Agora, labarik 200 resin mak kontinua faan sasan iha fatin Públiku iha Dili laran. Tanba ne’e, INDDICA iha esperansa ba nonu governu bele kria dekretu lei ida hodi nune’e bele fó biban ba INDDICA atu bele atua situasaun liga ba labarik sira ne’ebé kontinua faan sasan iha estrada públiku no iha merkadu.
Prezidente Institutu Defeza ba Direitu Labarik( INDDICA), Dinorah Granadeiru, hateten, situasaun balun ne’ebé INDDICA esforsu maka hamutuk ho Komisaun Nasionál Kombate Trabaillu Infantil, no ajuda husi UNICEF hodi dezenvolve proposta dekretu lei ida, ne’ebé mak iha oitavu Governu ne’e prepara ona maibé seidauk konsege lori ba konsellu Ministru.
“Tanba ne’e, ita espera nonu governu bele lori dekretu lei ida hodi nune’e bele fo biban ba INDDICA no instituisaun relevante sira hodi bele atua situasaun liga ba labarik sira ne’ebé kontinua faan sasan iha estrada públiku no iha merkadu,”dehan Prezidente INDDICA ba Jornalista sira, bainhira remata enkontru ho Prezidente Republika José Ramos-Horta iha Palácio Prezidensiál Bairo-Pite, Tersa 12/09.
Maibé Asesmentu ne’ebé mak INDDICA halo ba labarik sira barak liu mak faktór ekonomia tanba familia ne’ebé mak laiha rendimentu reguler bele fó impaktu ba sira, nune’e labarik sira deside hodi halo servisu ne’e atu ajuda sira nia familia, maibé maioria labraik sira ne’e kontinua asesu ba edukasaun tanba sira maneza sira nia tempu ho di’ak.
“Asesmentu ne’ebé ami halo iha 2019 mai to’o agora ita iha dadus, pro-volta labarik 200 resin mak kontinua faan sasan iha fatin Públiku” nia esplika
Enkuantu Prezidente nafatin apoiu ba servisu INDDICA iha futuru hodi bele haree situasaun labarik sira nian, hodi promove no proteje direitu labarik iha Timor-Leste.
