Home Analisa Kondisaun Estrada Husi Maliana Ba Postu Administrativu Sai Preokupasaun Ema Hotu Nian

Kondisaun Estrada Husi Maliana Ba Postu Administrativu Sai Preokupasaun Ema Hotu Nian

1136
0
hakerek nain Jemicarte Moniz dos Reis. [Foto: Dokumentu privadu | 29.12.2020]

Hakerek nain Jemicarte Moniz Dos Reis. Lic. AP.

Timor-Leste depois ukun an to’o agora, problema infrastrutura Estrada sai nafatin hanesan preukupasaun bo’ot ba Timor oan tomak, tanba ita hotu hatene katak infrastrutura Estrada pilar importante ba dezenvolvimentu nu’udar fundamentu importante hanesan motor ba dezenvolvimentu nasional. Governu iha politika katak atu dezenvolve seitor hotu iha area rurais, maibé kestaun Estrada sai problema bo’ot ba prosesu dezenvolvimentu tanba to’o ohin loron Estrada sai preukupasaun bo’ot ba ema hotu. Realidade ita hotu hatene katak kondisaun Estrada ne’ebé ligasaun Maliana ba Postu Bobonaro, Lolotoe no Cailaco oras ne’e nia kondisaun grave.

Nune’e mós iha Munisipiu Bobonaro Kapital Maliana kondisaun Estrada grave tebes hanesan iha parte Odomau no iha mos parte halimesak nian to’o mai iha parte Oeleu inklui mos Postu Administrativu Cailaco rai halai no halo Estrada sai klot, ne’e ameasa ema nia vida. Kondisaun Estrada husi Maliana ba Bobonaro, Lolotoe no Cailaco agora iha kondisaun ameasa liu-liu ba trasporte públiku udan tun rai att liu no komunidade sira labele hetan asesu ba transporte públiku hodi lori sira nia produtu lokal ba iha merkadu.

Munisipiu  Bobonaro  hanesan   odamatan   ba   investimentu    nasional,   tanbaMunisipiu Bobonaro hela iha  fronteira ho nasaun Indonesia.

Presiza Governu Timor-Leste  planeia  no  implementa  programas  kona   ba  konstrusaun   no rehabilitasaunestradas   no  ponte  sira  iha   Munisipiu  Bobonaro.  Atu  realiza  konstrusaun   no   rehabilitasaun estradas   no  ponte  sira ne’e governu sei halo investimentu  ida ne’ebé bo’ot tebes, hodi aktualiza no mellora sistema dezenvolvimentu kona ba estradas nasionais, rejionais ka municipais no rurais. Sistema ne’e sei hahu hodi halo manutensaun ne’ebé diak ba rede estradas no ponte sira hodi fasilita transportasaun sasan ho presu ida razoável ba povu, promove agrikultura hodi insentivu (ka dudu) kresimentu sector privadu nian no mos permite ba presta servisus governamentais bele la’o ho di’ak.  

Transportasaun sai hanesan aspeitu ida ne’ebé signifikante tebes ba iha atividade ekonomia  rai laran ita presiza Estrada ne’ebé diak no forte atu bele halo ligasaun ekonomia entre Postu ba Munisipiu no to’o iha Nasional inklui nasaun viziñu sira hanesan Indonezia. Estrada ne’ebé diak bele ajuda distribui produtu lokal ba iha cidade, no iha parte seluk povu husi Munisipiu no areas rurais mós bele asesu ba saude, edukasaun no informasaun iha capital. Sistema infrastrutura Estrada ne’ebé diak sei rezulta iha sistema distrubuisaun ne’ebé sufisiente no bele hasa’e rendimentu ekonomia rai laran.

Maibé realidade hatudu katak Estrada iha capital Maliana to’o agora sei att hela inklui mós Postu sira hanesan Bobonaro, Lolotoe no Cailaco. Kondisaun Estrada husi Postu Bobonaro ba to’o iha Ermera no Suai Covalima grave tebes. Tanba iha tempu udan kareta no motor labele halo operasaun ba mai. Dalabarak komunidade sira husi Bobonaro hato’o problema ne’e ba governu, maibé to’o agora governu la iha resposta. Husu ba ministeriu kompotente presiza hare didiak kondisaun Estrada ne’ebé mak komunidade sira enfrenta. Kondisaun Estrada iha Postu Bobonaro, Lolotoe no Cailaco ladiak halo komunidade barak kuandu hetan moras labele halo tratamentu saude iha hospital referral Maliana. Hau hanoin katak governu ida ne’e tenke tau atensaun ba seitor infrastrutura iha rai laran, atu nune’e povu ka komunidade ne’ebé hela iha area remotas sira ne’e bele sente mós dezenvolvimentu ida ne’e. Agora tama ona ba tempu udan, tanba ne’e governu tenke toma atensaun ba kondisaun Estrada iha baze nune’e bele fasilita diak liu tan transporte sira ne’ebé mak halo viagen ba Munisipiu.

Oinsa mak bele hadia kondisaun Estrada sira ne’e husi Maliana ligasaun ho Postu Administativu Bobonaro, Lolotoe no Cailaco, tanba Estrada ne’e importante tebes ba sirkulasaun ekonomia bainhira povu agrikultura sira hetan asesu ba trasporte hodi tula sira nia produtu lokal ba fa’an iha merkadu. Preukupasaun sira ne’e oinsa mak atu transmite ba iha Parlamentu Nasional no Governu. Ita presiza Intelektual husi Munisipiu Bobonaro oan sira ne’ebé mak agora dadauk kaer pasta hanesan Ministru, Deputadu, Diretór inklui Eis Ministru no Deputadu sira tur hamutuk fó hanoin ba malu hodi hato’o preukupasaun komunidade sira nian ba iha Governo no Parlamentu Nasional hodi disktute iha planu orsamentu  oinsa tau prioridade ba Estrada ne’ebé mak att liu iha Munisipiu Bobonaro.

Hau hanoin Munisipiu Bobonaro nakloke ba ema hotu ne’ebé hakarak investe iha sektores  ekonomia  hodi  hadian  komunidade nia  moris,  hasa’e  rendimentu no kria emprego ba populasaun iha Munisipiu ne’e. Maibe ita tenke servisu hamutuk atu dezenvolve diak ba Munisipiu ne’e, diak ba ambiente no fornese diak liu tanba ita hotu nia vida moris       iha fatin ne’ebé  ita hela ba.   

Tanba  Munisipiu  Bobonaro  iha  potensia  iha area  turista, hanesa  be’e manasMarobo no be’e morna  Borluli  iha  Marobo,  Munisipiu  Bobonaro  nia potensia iha produsaun agrikultura maka: Hare, café, batar, modo, fore mungu, tabaku, fore, sabraka, fore rai, kami, nu, fehuk, Ai Kamelia no seluk. Iha neba mos potensial ba fabrika, komersiu no industria na’an no  ikan.

Ita hotu hakarak infrastrutura estrada ne’ebé diak presiza suporta makas husi capital humanu. Ita hotu hatene katak infrastrutura Estrada maka sai hanesan pilar importante ba iha dezenvolvimentu ekonomia industria no atividade sira seluk iha komunidade nia le’et. Povu iha nasaun ne’e bele esforsu an hodi sai husi mukit bainhira iha infrastrutura ne’ebé diak atu suporta sira nia atividade.

Print Friendly, PDF & Email

LEAVE A REPLY

Please enter your comment!
Please enter your name here