Home Memoria PR Lu-Oló louva ho Obra Kreativu Monumentu Istoriku Labalou, Ossu

PR Lu-Oló louva ho Obra Kreativu Monumentu Istoriku Labalou, Ossu

959
0
Monumentu Labalou, Ossu

Presidente Lu-Oló louva imajinasaun kreativu hosi konstrusaun monumentu istoriku Labalou nian. Obra ida ne’e marka istoria sakrifisiu povo nian, nakonu ho mata-ben, nakonu ho ran, lakon ema diak sira. Monumentu rai valor istoria funu nian mak bele hatutan ba jerasaun foun sira.

Presidente Lu-Oló iha ninia liafuan makloke ba monumentu Labalou nian, nia louva konstrusaun ne’ebe halo ona, no fo hanoin kona ba sakrifisu povo nian, no mos lideres sira mak mate ona tanba organiza funu ba ukun rasik an ne’e.

“Monumentu ne’e imajinasaun kreativu ida. Obra ne’e atu marka istoria mak nakonu ho ran, matan ben, lakon ba buat hotu-hotu. Maibe iha tempu ne’ebe susar povo Timor hamrik metin nafatin hodi luta ba ukun rasik an. Fretilin mak hahu obra bot ida ne’e, Fretilin mak mata dalan. Mata dalan la iha la hatene ita atu lao ba ne’ebe.” Presidente Lu-Oló koalia lia hirak bainhira halo inaugurasaun ba Monumentu Labalou, 18/08, iha Labalou, Ossu.

Presidente da Republika ne’e mos hatete katak fatin Labalou ne’e fatin ne’ebe populasaun barak mai subar ba. Maibe hosi fatin ida ne’e, Presidente mos husu atu hanoin tutan fatin sira seluk ne’ebe iha valor istoriku.

“Fatin ida ne’e iha ninia valor istoria, fatin hanesan mos iha munisipiu sira seluk, inklui Matebian, Mindelu, Odomau, no seluk tan. Fatin sira ne’e hotu iha valor istoriku. Presija hadiak fatin sira ne’e no presija haburas sira nia valor istoriku.”

Presidente mos husu ba inan-aman sira, komunidade ne’ebe besik Labalou atu kuidadu fatin ne’e. Husu atu transforma fatin ne’e ba atividade ekonomia no turizmu hodi atrai turizmu hodi mai aprende ita nia istoria. Nia mos husu atu iha planu integradu ba fatin Labalou nian hodi inklui instalasaun ba ahi, bee, uma deskansa no istoria.

Reprezentante komunidade mak organiza konstrusaun ba Monumentu Labalou, Candido, nudar mos responsavel ba Kaixa Bua Malus, haktuir istoria pasadu nian kona ba oinsa fatin ne’e sai nudar fatin subar fatin populasaun nian. Nia konta tuir momentu difisil iha 1976-1977 tempu funu, populasaun barak halai mai subar iha fatin ne’e, hafoin hakat liu ba foho Matebian. No fatin ne’e kontinua uza nafatin nudar fatin resistensia bainhira populasaun tun mai rende hosi foho Matebian.

Veteranu Vasco ‘Criado’ Gama mos konta katak fatin Monumentu Labalou tau ba ne’e mak fatin saudoso Daitula halo enkontru ba, hodi halo planu funu nian. Fatin ne’e mos fatin ne’ebe Presidente Lu-Oló no Brigadeiru Falur sira halo abrigu ho planea luta armada iha area ne’eba hamutuk ho FALINTIL sira seluk.

Konstrusaun Monumentu ne’e halo ho valor orsamentu 7,000 dolar resin, no hahu konstroe iha 20 Outubru 2017.  Orsamentu ba konstrusaun mai hosi veteranu sira no hetan apoio mos hosi kompania sira iha Viqueque. Monumentu ne’e nia konstrusaun ho forma kilat musan, ho uma kik ba tur deskansa nian 4, no mos fatin hodi hateke panorama nian. Distansia hosi Loehunu nia kraik lao ba to’o monumentu ne’e besik kilometru 5. Iha dalan tun, bele visita mos abrigu jeral Lekiraka.

Seremonia inagurasaun ne’e partisipa mos hosi reprezentante kaixa sira iha Ossue no Viqueque nian balun, reprezentante administrasaun Viqueque, reprezentante F-FDTL, PNTL, Sekretariu Estadu Asuntu Veterano, Sekretariu Estadu Formasaun no Politika Empregu, no reprezentante kompania sira mak fo apoio ba konstrusaun monumentu ne’e, no mos komunidade sira mak hela besik area refere.

 

LEAVE A REPLY

Please enter your comment!
Please enter your name here