Home Notisia Sosa Asoens Partisipasaun 30%, Hein Aprovasaun PN, Regulador no Dereitu de Preferensia

Sosa Asoens Partisipasaun 30%, Hein Aprovasaun PN, Regulador no Dereitu de Preferensia

225
0
Protesta MKOTT nian hasoru Governo Australia, iha Emabaxada Australia nia oin (Foto: Chris White)

Tuir informasaun Xefe Negosiador, Xanana Gusmao, ohin (8/10) to’o hikas Timor-Leste ho aviaun hafoin ba halo negosiasaun atu sosa asoens partisipasaun 30% hosi ConocoPhillips. Akordu ne’e rasik preve hela kondisaun sira mak presija kompleta antes inisiu 2019.

Kondisaun ne’ebe temi iha deklarasaun hamutuk entre Governo Timor-Leste ho ConocoPhillips, iha Perth, Australia, 2 Outubru, 2018, ne’e mak sei hein aprovasaun orsamentu hosi Conselho Ministru no mos hosi Parlementu Nasional Timor-Leste nian, no mos aprovasaun hosi regulador no dereitu de preferensia hosi parseiru sira iha Joint Venture.

Dereitu de preferensia ne’e dereitu ida mak exsiti deit ba parseiru Joint Venture nian. Sira bele desidi oin-seluk bainhira hatetuk ba aspeitu oin-oin hosi benefisiu no riskus hosi sosa ka la sosa asoens 30% mak atu faan hosi ConocoPhillips.

Iha parte seluk, ONG Lao Hamutuk, publika tiha ona sira nia relatoriu ida (iha 4 Outubru 2018) ne’ebe hatudu sira nia preokupasaun kona ba kustu, riskus no impaktu sosial hosi prezensa kadoras iha parte Timor-Leste nian.

“Nasaun presija no merese hetan analiza detallu, no loloos, ho informasaun publiku kona ba kustu, benefisiu no riskus hosi projetu Greater Sunrise no Tasi Mane nian, molok uza povo nia osan bilaun doalres hodi selu kompania mina, kontraktor sira, individu sira, kompania sira seluk ne’ebe laiha kompromisiu naruk ba nasaun ka obrigasaun atu serve interese publiku.”

Lao Hamutuk mos hatete katak, “Timor-Leste sei selu tokon $350 ba ConocoPhillips iha inisiu tinan oin nudar kustu avansu no obrigasaun finanseiru ba kustu osan ne’ebe boot liu iha futuru. Tokon $350 ne’e osan ida mak dala rua boot liu osan ne’ebe tau ona ba edukasaun labarik sira nian iha Timor-Leste. Karik osan tokon $350 ne’e sei sai nudar parte ida hosi Orsamentu Jeral Estadu ba 2019 nian.”

Notisia jornal online Forbes (1 Outubru 2018) hatete katak Governo Timor-Leste iha expetativa kampu mina no gas sei tulun dudu makas liutan dezenvolvimentu iha Tasi Mane. Maibe dezenvolvimentu Sunrise iha Timor-Leste iha hela espekulasaun nian laran no ne’e sei lao iha dekada ida nia laran, karik akontese duni. ConocoPhillips hatete katak akordu ba faan asoens partisipasaun 30% ne’e sei kompleta iha 2019.

Lao Hamutuk nia relatorio mos nota katak, ba Greater Sunrise, asuntu sira relasiona ho finansiamentu, ekonomia, meioambiente no konsequensia sosial sira sei fo efeitu ba povo nia moris hosi jerasaun ba jerasaun, no sira nia konsequensia bo’ot liu duke emosaun patriotiku temporariu deit.

Ohin, tuir informasaun mak rona responsavel partidu CNRT nian balun hahu organiza ona ema hodi ba hasoru Xefi Negosiador, Xanana Gusmao iha Aeroportu Presidente Nicolao Lobato hodi kongratula Xefe Negosiador tanba konsege hetan ona akordu ho ConocoPhillips atu sosa asoens partisipasaun 30% ho valor ($350 milioens), iha loron 2 fulan Outubru 2018 liuba.

LEAVE A REPLY

Please enter your comment!
Please enter your name here