Reportajen Silvino Freitas
Ermera Ai-Kulat Mutin Organika (EAMO) maka grupu produtivu ne’ebé prodúz aikulat organika iha munisipiu Ermera, grupu nee mosu husi inisiativa joven sira nian hakarak, hodi kria servisu ba an rasik, nunee ai-kulat ne’ebé sira produz fa’an iha supermerkadu sira iha Dili laran, no mós balun fa’an ba komunidade sira, rezultadu husi grupu refere mak sira rasik senti katak maskí sira ho idade produtivu maibé laiha ona depedénsia ba inan ho aman nune’e mós servisu publiku sira estadu nian, tanba ne’e grupo EAMO eziji ba governu, la’ós presiza maibé tenke investe no tau prioridade ba seitór agrikola sira no ho seriedade atu apoiu grupu agrikultura sira ne’ebé ezisti ona iha Timor Leste.
Responsavel EAMO Julio Soares haktuir, EAMO harii 16 fulan Junu 2018 ho istória moruk husi grupu joven vulneravél sira hanesan joven balun laiha inan ho aman nomós balun inan ho aman laiha hotu, tanba haree mós ba numeiru dezempregu ne’ebé aas nune’e joven sira ne’e ho inisiativa rasik harii grupu hodi emgrega an nomós ema seluk nune’e bele responde ba nesesidade ita nian, bainhira harii guru refere sira sente kontente tanba iha sira balun ne’ebé mai husi eskola ETCI sira mak tau ideia hamutuk hodi hamosu grupu refere hodi emprega an no la depedensia ona ba inan-aman.
“Membru iha grupu ne’e ema hamutuk na’in 15 maiória sira mai husi universidade ETCI” dehan Julio Soares responsavel grupu EAMO iha Faról, (19/12).
Entretantu prosesu hamosu aikulat organika ne’e Julio esplika, atu prodúz aikulat organika ne’e iha matéria prima 4 ne’ebé mak importante tebes maka ai hut ne’ebé ema kado’o ona, haree hut, ahu ne’ebé uza ba mama nomós bee, nune’e ka’or hamutuk hatama ba iha plastiku hodi da’an nune’e bele hamosu ai-kulat, produtu refere 100% organiku no la kontaminadu tanba mai husi materiál organiku no la uza adubu kimiku balun.
“Ai-kulat ne’ebé ami prodúz durante ne’e ami fa’an iha supermerkadu sira iha Dili laran, nune’e mós balun fa’an ba komunidade sira ho mós parseiru sira hanesan emabaixada Australia ho Nova Zelandia, prosesu fa’an iha variedade tolu maka iha kada box iha $1.00, ida maka bainbain bolu meia kilo ne’e fa’an ba $2,50 sentavu no iha kilo ida maka $5.00, ami nia produtu ami lori mai iha Dili laran ne’e loron balun deit stock sira mamuk hotu tanba kuantidade merkadu ne’e bo’ot liu, maskí nune’e nafatin responde ba kbi’it ne’ebé prodúz, kuaze ami hatama ona mai iha loja lubun ida iha Dili laran hanesan supermerkadu iha tasi-ibun, Lider Supermerkadu, loja agrikultura, loja do povu Litastore ne’e ami hatama hotu, hirak ne’e garante no komunidade sira konsumu hotu kedan” dehan Julio.
Julio dehan tan kona-ba rendimentu ba iha sira nia grupu maka sente sufisiente tanba bele uza ba sira nia gastu ba nesesidade nian bele naton ba sira nia moris, husi atividade produz aikulat nee bele fo moris ba sira maskí la’ós 100% maibé bele iha 50% to’o 60% bele hola fo’os saku ida no mina 5 liter iha fulan ida, nune’e Julio konsidera produsaun liga ba seitor agrikultura ne’e importante hotu atu governu tau atensaun no seriedade ba governu atu apoiu grupu agrikultura nune’e bele hamoris no fo moris ba ema hotu hotu, nune’e governu tenke tau prioridade ba seitor agrikultura hodi investe ho seridade.
“Governu tenke tau prioridade liu ba seitor agrikultura tanba ita hatene katak to’os nain barak maka iha ita nia teritoriu maski governu tau prioridade liu ba sasan esportasaun ne’e hatudu katak sira invade ka imbargo ita nia produtu sira, governu tenke haree didi’ak tanba hanesan ita akompaña ema hatama tomate husi rai liur ida ne’e ami nu’udar agrikultura sente lakon vontade no fuan moras” konklui Julio.
