Home Analisa Traballadór Setór Informál No Merkadu Ne’ebé La Livre Ba Sira

Traballadór Setór Informál No Merkadu Ne’ebé La Livre Ba Sira

3102
0
Negosiador informal (Foto: Diligente)

By Nuno Rodriguez Tchailoro, Peskizadór Independente

Timor-Leste nia ekonomia ohinloron bele karateriza husi agrikultura subsisténsia, setór formál no informál.  Iha sidade kapitál país, númeru traballadór iha setór informál iha Díli hetok aumenta anualmente. Tuir peskiza ne’ebé Matadalan Institute (MDI) halo iha 2020, traballadór informál, bazeia ba Sensus Populasaun 2015, reprezenta 22% husi totál traballadór tomak iha Díli.* Tansá númeru traballadór setór informál aumenta husi tinan ida ba tinan seluk?

Resposta simples mak setór formál ezistente seidauk konsege kria empregu hodi absorve traballadór husi agrikultura subsisténsia no husi setór informál. To’o ohinloron  setór formál husi estadu, maski ki’ik, maibé  dominante ba fó empregu nune’e mós kapasidade setór privadu hodi kria empregu.  Governu nia polítika ne’ebé espresa beibeik klaramente katak investimentu estranjeiru mak sei sai forsa prinsipál ida ne’ebé dudu kriasaun empregu too ohinloron seidauk iha fundasaun no kontinua hakdasak hela. Maioria ema estranjeiru nia negósiu iha Timor-Leste orienta de’it ba xupa osan husi Fundu Petrolíferu ne’ebé gasta iha rai-laran liuhusi orsamentu estadu ba sira-nia país.

Se ita haree didi’ak, akumulasaun primitiva tuir pensamentu Marx nian, ne’ebé nu’udar prosesu hasees ka hakotu produtór husi meius ba produsaun foin akontese iha parte ki’ik de’it husi ita-nia sosiedade. Maioria produtór sei sai na’in ba sira-nia meius produsaun rasik, liuhusi subsisténsia no halo negósiu informál sira, no  balun ne’ebé tama ona nu’udar traballadór iha setór formál maibé sei kontinua iha kontrolu ba sira-nia meius produsaun, proletarizasaun ne’ebé la’o foin okupa porsaun ki’ik husi ita-nia sosiedade.

Fatór sira ne’ebé kontribui ba númeru traballadór setór informál aumenta

Se nune’e, fatór saida loos mak kontribui ba númeru traballadór setór informál aumenta babeibeik?  Iha áreas rurais sistema kapitalista sei funsiona hanesan bolsas de’it (kantong-kantong), tanba agrikultura subsisténsia sei dominante, ekonomia osan seidauk okupa tomak sidadaun sira-nia moris  tan kamponés sei prodús rasik ninia ai-han, nia presiza osan de’it ba nesesidade bázika ne’ebé nia rasik la prodús no ba nesesidade sosiál sira seluk.  Sirkulasaun osan iha área rurál mínimu tebes. Sira ne’ebé servisu iha setór formál iha área rurál hanesan funsionáriu públiku bele sura ho liman-fuan. Produsaun ne’ebé menus no dependénsia ba importasaun loke dalan ba traballadór setór informál buka manán-moris iha Díli ne’ebé oportunidade empregu boot liu no husi loron ba loron nia númeru kontinua sa’e. Maibé, sistema governasaun ne’ebé dezenvolve ohinloron la fó atensaun ba fenomenu ida ne’e, traballadór ne’ebé surplus husi setór informál. Traballadór iha setór informál,  balun hetan rendimentu di’akliu kompara ho  setór formál ne’ebé ho saláriu mínimu $115 mensalmente. Ezemplu ida mak  negósiu ambulante faan ai-fuan iha Díli laran, maibé sira-nia kontribuisaun nunka sura iha ekonomia lokál.

Ita tenke admite katak estabelesimentu merkadu tais iha Kolmera no merkadu ai-fuan iha Lecidere nu’udar programa dezenvolvimentu ne’ebé reprezenta povu kiak sira nia interese. Merkadu rua ne’e tama ona iha lista sítiu turístiku ne’ebé turista sira bele vizita bainhira mai Díli.  Maibé, ohinloron programa hanesan ne’e la’ós ona prioridade governu nian. Inisiativa ne’e bele sai estudu di’ak hodi sukat ninia impaktu husi fornesimentu merkadu ba setór informál hodi hatene ninia transformasaun husi setór informál ba formál no oinsá nia ligasaun ba produtór sira ne’ebé laiha asesu ba supermerkadu sira.

Husi sorin seluk, klase kapitalista doméstika moris no haboot husi elite polítiku liuhusi projetu públiku kontinua funsiona hanesan rentier ne’ebé la investe sira-nia lukru iha dezenvolvimentu industriál. Surplus ekonómiku suli ba kanál laprodutivu hanesan konstrui uma luxu iha Díli no Bali,  pasiar ba rai-liur,  no aumenta feen ki’ik.  Klase kapitalista doméstika ne’ebé reinveste nia osan prefere atividade negósiu iha tasibalun  duke iha rai-laran ho razaun oinoin hanesan seguransa no kapasidade absorsaun ekonómika. Sa tan, formasaun no  konsolidasaun estadu ne’ebé orienta ba rumu instrumentu klase minoria ne’ebé dominante nian halo povu nu’udar sekundáriu.  Reprezentasaun orientasaun estadu nian bele haree liuhusi inveestimentu ne’ebé la fó prioridade ba transformasaun husi setór informál ba formál no hametin kapasidade kamponés subsisténsia  nian nu’udar kbiit ida atu bele iha kontrolu husi produsaun to’o distribuisaun atu nune’e bele iha kbiit hodi kompete iha sistema kapitalista.  Dalabarak setór formál nia prezensa ne’ebé sai intermediáriu entre produtór no merkadu halo kiak liután kamponés husi agrikultura subsisténsia. Ezemplu ida mak kompañia NCBA ho produtores kafé, ne’ebé sosa produtu kafe ho folin baratu hodi hetan lukru boot iha merkadu internasionál. 

Esperiénsia dezenvolvimentu rentier state iha país barak hatudu ona, katak dependénsia ba minarai no gás hamate ekonomia doméstika, laiha kompetisaun, inflasaun aas tanba produsaun doméstika menus no dependénsia ba importasaun ne’ebé aas. Rentier state mak estadu ida ne’ebé moris dependente de’it ba  fontes esterna sira, iha kazu Timor-Leste, husi esplorasaun minarai no gás (maibé bele mós husi fontes esterna  rendimentu esternu sira seluk hanesan remittances no apoiu husi kooperasaun internasionál) no la’ós husi produsaun, investimentu no jestaun risku (fontes externas no rendementu externu). Sistema rentier state ikusmai forma padraun dezenvolvimentu ekonomia no polítika nasaun ida nian. Ekonomia iha rai-laran depende makaas ba investimentu públiku. Iha modelu rentier state, papel estadu sai intermediáriu ba Fundu Petrolíferu ho ekonomia sira seluk, liuhusi investimentu públiku. Estadu mak aloka osan ba ekonomia doméstika. Modelu ekonomia ida ne’e favorese setór públiku tanba aloka osan (rentier) no harii sistema patronajen harahun merkadu no mudansa ba estrutura kompetitiva.

Iha rentier state, aliadu prinsipál iha sistema patronajen mak elite sira ne’ebé fó fundasaun no kbiit ba konsolidasaun polítika no ekonómika, la’ós ho povu. Iha modelu dezenvolvimentu rentier state, povu sempre sai instrumentu de’it ba elite nia interese polítiku no ekonómiku tanba latama iha sistema patronajen atu hetan benefísiu ba lukru no pozisaun polítika.  Tan ne’e maski Timor-Leste riku minarai no gás, iha espresaun metafórika,  ita mak karau na’in, maibé ema seluk mak hemu nia susu-been. Sira ne’ebé hemu nia susu-been mak sai bokur ba nafatin, ikusmai povu ne’ebé sai na’in ba karau sai krekas babeibeik no karau rasik ikusmai sai  krekas no mate. Ita-nia minarai kontribui ba progresu produtór sira iha tasibalun atu sai bokur no hariku de’it elite Timor ne’ebé moris husi patronajen ne’ebé sai sentru ba konsolidasaun podér. Estadu prodús riku ba klase elite ne’ebé tama iha sírkulu sistema patronajen ne’ebé iha koneksaun direta ho sistema dominasaun no esplorasaun ne’ebé konsolida an babeibeik husi tempu ba tempu.  Sistema ukun ne’ebé konsolida an rezulta ba the distribuition of functions between horsemen and horse, impresta espresaun metafórika husi  eskritór boot husi Uruguai, Eduardo Galeano. Ka artikulasaun seluk kona-ba relasaun governu ho nia povu iha ita-nia rain koñesidu ho povu mak kuda no governu mak sa’e. Maibé ida ne’e la’ós ba governu nu’udar orgaun soberania maibé elite ne’ebé konsolida-an iha governu hodi hasees povu nia interese.

Marjinalizasaun traballadór setór informál

Se ita uza lente haboot nian, lupa, atu bele haree realidade sosiál no ekonómiku ho besik no moos, Timor-Leste iha nia karaterístika únika uitoan, tanba maski traballadór ida iha setór formál, liuliu sira ne’ebé simu saláriu mínimu ka liu uitoan, iha sentru sidade,  barak husi sira hala’o negósiu iha setór informál.  Nune’e mós iha área rurál maski membru família ida serbisu iha setór formál maibé membru husi uma-kain no traballadór  ne’e rasik kontinua halo produsaun agríkola tanba saláriu ne’ebé hetan mensalmente la to’o ba sira-nia nesesidade fulan ida tomak nian. Ekonomista sira bolu prátika ne’e  nu’udar  ekonomia íbrida. Ema seidauk halo estudu kona-ba kontribuisaun ekonomia íbrida ba uma kain no sosiedade iha ita-nia rain, karik bele halo komparasaun kontribuisaun ekonomia ibrida no setór formál loos de’it  ba uma kain sira iha ita-nia rain.

Bainbain kamponés sira iha plantasaun kafé ne’ebé pratika monokultura. Sira husi Uniaun Agrikultura Ermera (UNAER) hateten katak iha tempu kolleta kafé sira riku durante fulan-tolu, maibé depois ne’e sira kiak durante fulan 9. Signifika kafé timor koñesidu iha mundu tanba nia kualidade aas, maibé maioria produtór sira moris sei mukit. Ne’e hatudu katak opsaun nu’udar kamponés iha área rurál la garante sira-nia moris tan laiha osan ba sosa ai-han (tanba sira prodús mak kafé, la’ós ai-han seluk) no ba nesesidade sira seluk. Tanba ne’e, opsaun ne’ebé nakloke liu ba sira atu manán-moris mak buka empregu iha setór informál iha sidade Díli no buka sorte atu hetan empregu iha setór formál iha Díli.  Maibé maioria husi sira ne’ebé mai Díli sai traballadór iha setór informál. Ba sira ne’ebé iha kbiit ekonómiku uitoan mak sai traballadór iha setór formál iha estranjeiru, maibé nia númeru ki’ik liu kompara ho sira ne’ebé buka empregu iha setór informál. Imajina de’it,  se laiha oportunidade sai traballadór estranjeiru, númeru traballadór iha setór informál sei boot liután.

Tansá migrasaun husi munisípiu seluk mai Díli aumenta? Ema barak nia resposta mak tanba sidade kapitál país nia oferese asesu ba edukasaun liuliu ba ensinu superiór no  oportunidade empregu la’ós agrikultura di’akliu kompara ho sira-nia rai oríjen. Migrasaun ne’e akontese la’ós tanba sira-nia vontade maibé tan situasaun ekonómika no sosiál mak obriga. Maski  agrikultura mak sai fonte ba empregu boot liu iha rai-laran maibé prátika agríkola sei nafatin subsisténsia ho produsaun natoon ba konsumu no uitoan de’it mak ba faan.  Aleinde ne’e, estadu nia investimentu ba agrikultura ki’ik liu fali nia despeza ba sosa ai-han husi tasibalun. Estadu nia investimentu ba hasa’e produsaun nasionál ki’ik liu ho nia despeza ba produtus importadus. Seidauk sura ho subsídiu oioin ne’ebé  idozu no veteranu nian ne’ebé  kontribui mós ba hamate produsaun iha rai-laran. Tanba ne’e, labele mai ho hanoin katak dudu sees traballadór setór informál ho razaun sira-nia prezensa hafoer sidade Díli atu sira fila ba sira-nia rai hodi hasa’e produsaun agrikola. Pensamentu ne’e hanesan mós ho portugés sira ne’ebé horiuluk haree Maubere oan sira nu’udar insivilizadu, agora ita mai ho mentál superioridade kulturál nu’udar Dili oan  hasoru foho-oan ne’ebé konsidera sira nu’udar inferiór. Nia diferensa ho kolonialista portugés saida? Nia diferensa ida mak kolonialista portugés mai ho programa asimilasaun kulturál, no ho ukun ida agora haree, ema foho oan sira hanesan lixu tanba ne’e tenke hamoos husi sidade Díli.

Ita presiza haree ho luan tansá kamponés sira nia produtividade menus. Iha  fatin balun, produtividade iha área rurál aumenta tanba iha inputs husi organizasaun sira seluk, la’ós de’it asesu ba merkadu, maibé mós hetan formasaun oioin, inklui ba jestaun no kapasidade téknika seluk.  Tansá uluk estudante sira ne’ebé mai kontinua nia estudus iha Díli iha tempu kolonialista portugés no okupasaun Indonézia sira nia ai-han depende ba produsaun rasik husi família iha foho, maibé hafoin independénsia família sira iha foho nia fós no mina depende husi sira-nia ba nia oan sira husi Díli ne’ebé laiha toos?

Se ita ko’alia kona-ba mobilidade klase, perguntas boot ba ita hotu,  kamponés na’in-hira mak husi  klase proletariadu sa’e ona mai klase média? Klaru katak iha, maibé nia númeru karik ki’ik liu kompara ho klase média no klase burgeza ne’ebé hetan rendimentu liu liuhusi dalan legál no ilegál hodi  reinveste fali sira-nia osan ba iha setór produtivu no servisus  ka sai kompradór hodi fasilita interese ekonómiku ema estranjeiru sira-nian.  Husi númeru ki’ik ne’ebé nia mobilidade sa’e, barak liu mai husi intervensaun ONG sira no la’ós husi esforsu governu nian. Governu nia intervensaun ba hasa’e produsaun iha kampu barak liu mak ho interese polítiku atu manán eleisaun duke fó apoiu finanseiru no ekipamentu atu kamponés sira bele sai negosiante loloos.

Distribuisaun espasu públiku ne’ebé la justu

Númeru migrante sira husi munisípiu seluk mai Díli halo negósiu iha setór informál aumenta husi tinan ba tinan.    Infelizmente, númeru traballadór iha setór informál aumenta maibé merkadu ne’ebé fasilita husi estadu la aumenta.  Merkadu ne’ebé harii husi estadu hatuur loos iha sidade Díli nia periferia.  Muda merkadu Komoro ba Manleuana,  Merkadu Munisipál transforma sai CCD, merkadu Taibesi no Bekora. Espasu públiku ba merkadu ne’ebé limitadu no la koresponde ho númeru negosiante informál sira, no hatuur loos iha sidade nia ninin ne’ebé dook husi ema barak nune’e  mós difikulta liu sira-nia moris. Tanba ne’e, traballadór setór informál laiha dalan seluk, atu bele sustenta nia moris, dalan mak  okupa espasu públiku sira hodi bele hetan doit metan ida.

Estadu utiliza espasu públiku estratéjiku ba nia instituisaun sira atu hala’o programa governasaun no  entrega ba elite minoria ne’ebé iha kapitál boot atu halo sira-nia negósiu. Ba emprezáriu sira ne’ebé hetan ona dólar tokon ba tokon husi projetu públiku, estadu fó aluga tan rai no propriedade sira ne’ebé jeografikamente estratéjiku ba halo negósiu. Iha Díli,  emprezáriu ida bele hetan espasu públiku barak atu halo nia negósiu oinoin enkuantu ita-nia ema barak husi setór informál lahetan fasilidade sira ne’e. Ho kapasidade kompra ne’ebé boot emprezariu sira bele harii uma no edifísiu ho kondisaun di’akliu atu bele halo estensifikasaun no intensifikasaun negósiu.   Emprezáriu xinés tan ho sira-nia kapitál, sira uza dalan seluk, sira la okupa propriedade estadu nian, maibé aluga rai ba tempu naruk husi rai-na’in sira ne’ebé susesu tebes. Iha sorin ida, traballadór setór informál la hetan espasu públiku atu halo negósiu, prezensa negósiu xinés nian hamate no hakloot liután setór informál nia merkadu. Espasu públiku ba ema kiak sira  iha sidade Díli husi loron ba loron menus babeibeik no husi sorin seluk grupu minoria mak dominante ba espasu públiku ba negósiu no ba sira-nia hela fatin ne’ebé hamosu espesializasaun iha sosiedade, ida espesialista ba manán no ida espesialista ba lakon.

Adisionalmente, iha nasaun ne’ebé de’it bainhira iha densidade populasaun aas tanba aglomerasaun ho ema barak  iha bairru, pratikamente bele sai merkadu potensiál ba halo negósiu. Maibé keta haluha,  maioria bairru barak iha Dili laran laiha Estrada ne’ebé liga ba uma kain ida-idak. Tan ne’e,  maski iha densidade populasaun aas maibé labele sai merkadu potensiál. Bairru sira ne’ebé dook husi estrada públiku, laiha lixeiru, barak hili atu soe foer iha fatin arbiru de’it. Sira ne’ebé iha propriedade luan uitoan mak loke kioske iha sira-nia oin ka sorin. Iha bairru barak iha Díli, espasu públiku ba interasaun sosiál  de’it laiha ona sa tan merkadu ba setór informál. Maioria abitasaun iha  bairru ne’ebé la eziste durante kolonizasaun Portugés no okupasaun Indonézia kuaze desorganizadu, laiha estrada públika, laiha drenajen no  lixeiru. Bairru sira ne’e, aleinde desorganizadu, la’ós estratéjiku ne’ebé nunka bele sai sentru ba komérsiu. Aumenta tan ho sidade Díli ho foho lolon boot liu fali nia rai tetuk, negosiante informál buka mak espasu públiku no privadu ne’ebé asesível ba makfaan no maksosa sira bele hasoru malu.

Governu nia intervensaun hasoru setór informál hodi hasai populasaun husi espasu públiku sira reflekte mentalidade ukun-na’in sira sidade Díli la’ós sai merkadu ba setór informál maibé ba de’it setór formál. Maski estadu seidauk iha polítika ba ordenamentu territóriu maibé atuasaun husi Governu bele reprezenta ona polítika utilizasaun rai, sidade Díli la’ós sai moris fatin ba no merkadu ba ema kiak sira. Ho naran sidade Díli ne’ebé moos no dignu hodi hanehan povu nia dignidade. Ho naran sidade ne’ebé moos no dignu, Governu hakarak subar realidade katak númeru interveniente iha ekonomia informál aumenta babebeik iha sidade Díli no hakarak subar mós nia inkapasidade hodi garante sidadaun hotu-hotu nia direitu no liberdade hanesan no hamosu falii  solusaun ida ne’ebé olístiku no integradu. Maibé triste liu mak elite sira ne’ebé mai ho kapitál boot uza espasu públiku  sira no halo privatizasaun hodi halo negósiu maski lei bandu no governu husik hela tan sira ne’e kontribui reseita boot ba estadu. Prátika ne’e hatudu katak Governu konsolida liután sidade Díli ba riku sira no sidade Díli la’ós ba ema kiak sira. Merkadu livre de’it ba ema elite sira maibé la livre ba traballadór husi setór informál.

Ema la kontra programa atu halo sidade Díli sai moos no furak, maibé Governu presiza kria mós kondisaun ba setór informál sira atu sira bele kontinua halo negósiu iha Díli laran. Tenke rekoñese katak tanba estadu nia auzénsia iha polítika ordenamentu territóriu no hatudu autoridade atu obriga  sidadaun  kumpre lei no ordem, traballadór husi setór informál okupa espasu públiku sira. Governu kria mós kondisaun sosiál no ekonómika ba dezenvolvimentu agrikultura subsisténsia, setór informál atu bele transforma an sai formál atu nune’e sidadaun bele moris hanesan ho sidadaun ida ne’ebé dignu no kria espasu públiku ba traballadór setór informál bele sobrevive.

Hasai hodi biit nia sidadaun husi  hela-fatin no husi merkadu  estrada ninin sein planu di’ak ida sei afeta sira-nia moris hatudu katak Estadu la konsidera ema ida-idak ka família sira nia esforsu ba sira nia an, ba sira-nia família, sosiedade no nasaun.

Ita bele haree orden despeju ba fatin-fatin katak governu hili mak  tata kanek boot no husik hela nia nehan hela metin iha sidadaun  no sidadã nia kakorok, atu ran turu uitoan-uitoan, laiha esperansa ho terus desumanu inkomparável,  mate neineik-neineik lahó dignidade iha Timor-Leste, país ne’ebé sira mós kontribui ho orgullu atu hothotu bele moris di’ak no ho justisa sosiál.


* Dadus traballadór setór informál bazeia ba Sensus Populasaun 2015, se bazeia Sensus Populasaun 2023 nia númeru sei aumenta tan. Bele lee relatóriu Setór Informál iha Timor-Leste Durante Covid-19 husi Matadalan Institute ho apoiu husi Oxfam no Profesór Bret Inder husi Monash University, Agostu 2020.

Print Friendly, PDF & Email

LEAVE A REPLY

Please enter your comment!
Please enter your name here