Reportajen Umbelina dos Reis
Jestor Programa Fundasaun Haburas, Jemicarter Moniz dos Reis liu hosi Konferénsia Imprensa Media Center hateten, Fundasaun Haburas nia ezisténsia ko’alia kona-ba ekosistema, maibé liga ho Orsamentu Jeral Estadu (OJE), governu la tau atensaun másimu ba setor turizmu, ekosistema no agrikultura, tanba realidade governu agora ladun tau prioridade ba setor trizmu iha rai laran no Sekretáriu Estadu Meiu Ambiente moos laiha, entaun se loos mak atu haree konaba asuntu ekosistema ne’e.
“Tuir loloos Sekretáriu Estadu Meiu Ambiente ne’e tenki iha, hodi haree ba asuntu ekosistema no edukasaun ambiental tanba komunidade maioria seidauk iha koñesimentu konaba jestaun lixu, nune’e Fundasaun Haburas informa katak importante tebes tenki tau OJE 2024 nian, hodi aloka ba setor agrikultura, turizmu no edukasaun ambiente.” Dehan Jemicarter dos Reis, liu hosi Konferensia Imprensa Media Center, iha Fundasaun Haburas, tersa-feira, 19/12.
Nia Informa, Edukasaun Ambiental kontinua iha problema tanba laiha Sekretáriu Estadu Meiu Ambiente ne’ebé tau matan ba asuntu refere tanba Diretor Jeral mesak ne’e labele halo buat ida, tanba realidade estadu no governu ladun tau importánsia ba setor turizmu, por ezemplu hanesan fatin turizmu Cristu Rei tasi ibun kontinua fo’er no nakonu ho lixu.
Nia dehan, diversifika setor turizmu ne’e importante tebes iha ita nia rai no ita labele dependensia ba de’it mina tanba mina mos agora da-dauk atu maran ona, entaun setor turizmu ne’e garante katak bele diversifika ba setor ekonomia iha rai laran, nune’e Fundasaun Haburas sente katak oinsá ita servisu hamutuk ho governu hodi haree ba setor turizmu iha rai laran.
Nia konklui, Fundasaun Haburas da-dauk ne’e hala’o peskiza konaba Edukasaun Ambiental nian oinsá atu kria modul konaba Edukasaun Ambiental nian nune’e Edukasaun Ambiental bele tama iha Kurikulum Nasional, nune’e halo sosializasaun ho komunidade sira hodi koñese di’ak konaba ambiente, tanba realidade komunidade maioria seidauk iha koñesimentu konaba ambiente no jestaun lixu.
