Home Analisa $750 Mil ba Dezastre Naturais iha Indonesia, Oinsa ho Sobreviventes Konflitu Pasadu?

$750 Mil ba Dezastre Naturais iha Indonesia, Oinsa ho Sobreviventes Konflitu Pasadu?

124
0
Viuva sira hosi Masakre Liquisa nian (foto: JSMP)

Timor-Leste hatudu ona ninia jestu solidaridade ba povo Sulawesi, Indonesia. Maibe povo Timor-Leste mos hein jestu solidaridade Governo Indonesia nian ba sobrevivente violasaun dereitus umanus pasadu nian, nudar haktuir ona iha Relatoriu Komisaun Lia Los no Amizade (Truth and Friendship Commission).

Timor-Leste fo tulun solidaridade 750,000 dolar ka 10 Milioens Rupiah ba vitima rai nakdoko no dezastre tsunami iha Indonesia sentral, Sulawesi. Dezastre mak akontese oho tiha ona ema nain 2,045.

Tulun solidaridade ne’e entrega hosi Premeiru Ministru Taur Matan Ruak ba Ambasador Indonesia, Sahat Sitorus, loron rua liuba (10/10), iha Palacio Governo. Espera katak tulun ne’ebe Timor-Leste fo bele ajuda esforsu rekuperasaun, ba vitima, rehabilitasaun no rekonstrusaun area sira mak afetadu hosi dezastre naturais mak akontese.

Iha okaziaun simu tulun ne’e, Ambasador Indonesia hatete katak doasaun ne’e sei entrega ba Ajensia Nasional Mitigasaun Dezastre Indonesia nian.

Tulun ne’ebe Timor-Leste fo ba dezastre ne’ebe akontese iha Indonesia hamutuk dala rua ona. Fulan rua liu ba tulun solidaridade ho volume orsamentu mak hanesan fo Indonesia hodi tulun vitima sira iha Lombok, Indonesia.

Timor-Leste nia tulun ba Indonesia ne’e bele konsidera nudar parte ida hosi implementasaun Relatoriu Komisaun Lia Los no Amizade (Truth and Friendship Commission) ne’ebe temi kona ba Rekomendasaun Aspirasional no Tempu Naruk nian.

Vitima ho sobrevivente sira mos hein katak Governo Timor-Leste sei fo tulun mak hanesan ba vitima no sobrevivente funu nian mak sei moris hela iha mukit no terus nia laran.

Sobrevivente funu nian ida, Carlos da Silva (tinan 48), expresa katak nia mos siente triste ho saida mak akontese iha Palu, Indonesia. Dezastre naturais ne’e halo ema barak sai vitima no moris terus. Sira merese duni hetan tulun hosi Governo. Maibe Carlos mos husu atu Governo Timor-Leste atu tau matan liutan ba sobrevivente sira mak kontinua husu governo nia tulun.

“Ami mos sei terus hela. Dezastre la kona ami, maibe ami nia sofrementu ne’e lori tempu kleur tebes. Ami husu atu Governo mos tau matan baa mi”, Carlos hatete.

Maibe parte Indonesia nian seidauk haree hetan saida mak Timor-Leste hatudu liu hosi jestu solidaridade Timor-Leste nia ba dezastre naturais iha Indonesia.

Tinan 2005, Timor-Leste ho Indonesia establese tiha Komisaun Lia Los no Amizade (CTF). Bainhira Komisaun ne’e kompleta nia servisu, Komisaun ne’e rekomenda atu fo tulun ba vitima pasadu nian, liliu vitima tortura no violensia sexual. Komisaun ne’e mos husu atu haree ba asuntu ema lakon nian, liliu atu fahe informasaun ba malu no buka tuir ema lakon durante funu, nune’e mos atu buka hetan restus mortais sira.

Espera loron ida, Indonesia hanoin hetan hodi tulun buka tuir ema lakon besik 4,000 resin mak identifika ona iha relatoriu CAVR. Espera Indonesia mos bele fo tulun ba sobrevivente funu nian mak sei kontinua hasoru terus no susar iha sira nia moris.

 

LEAVE A REPLY

Please enter your comment!
Please enter your name here