Home Feature Fila Liman Hodi Hatutan Moris, Feliciana: Bainhira Hahan Laiha,Vizinhu Mak Ajuda Netik

Fila Liman Hodi Hatutan Moris, Feliciana: Bainhira Hahan Laiha,Vizinhu Mak Ajuda Netik

1625
0
Feto faluk Feliciana Mendoca fila liman iha rotunda Francisco Xavier. [Foto: David da Costa | 04.09.2020]

Reportazen David da Costa Gusmao

Inan feto nia kulit ne’ebe komesa namkurut tanba fator idade no karik mos tanba hanoin barak konaba moris todan ne’ebe nia tenke leba rasik, lakon kaben no lakon oan mane, halo Feliaciana laiha kbiit atu forsa. Ba Neon Metin nian matan wen turu tun, habokon nia hasan ne’ebe komesa namkurut, konfesa ba Neon Metin katak bainhira sira hahan laiha, nia vizinhu sira mak fo netik hahan ba sira hodi han, atu bele augenta ba moris loron aban nian.

Tur iha trotoar sorin besik rotunda Francisco Xavier, laos tur hodi hateke rai maibe tur hodi hatutan moris liu hosi faan malus. La interese poulusaun, rai rahun no rai manas importante loron ida bele hetan netik dollar ida.

Feliciana Mendoca idade 65, hosi Daisoli, Municipiu Aileu ne’ebe desidi tun mai sidade Dili hodi bele sustenta nia moris, tur rotunda Francisco Xavier iha Audian, Feliciana faan nia buah ho malus. Jornalista Neon Metin iha interese atu konnese besik liu, inan Feliciana ne’ebe mak idade ona maibe tanba nesidade lor-loron, ezije nia hodi halo netik buat ruma iha nia moris.

Bainhira jornalista Neon Metin hakbesik ba inan faluk ne’ebe mak tuur hela iha trotoar leten, ne’ebe faan hela buah, malus, tabaku, sabraka, haas no mina forai (samean) nian  konfesa katak nia mai faan sasan iha ne’e atu bele sustenta nia moris no bele selu beoan nia eskola ne’ebe mak nia aman mos husik hela.

“Hau mai faan sasan hanesan ne’e, durante hau nia kaben husik hau iha tinan tolu liu ba, hau nia kaben mak sei moris karik hau mos la mai tuur  faan sasan hanesan ne’e,  maibe hau nia kaben husik ami ho hau nian oan nain rua iha tinan tolu liu ba, entaun hau mai faan sasan iha ne’e, hodi hetan netik osan ruma hodi bele selu hau nia beoan nia eskola, ne’ebe mak nia aman mos husik hela tinan lima liu ba”, dehan inan faluk ne’e ho matan ween nakonu iha nia matan.

Inan Feliciana ne’e hatutan nia iha oan nain tolu, maibe nia mos tenke lakon nia oan mane boot ne’ebe mos mate ona, bainhira iha tinan lima liuba, iha Kaikoli aldeia 02 bainhia ai-han uma, nia koko atu salva sasan sira iha uma laran, maibe la konsege no ai-han mos nia oan mane no la konsege salva nia vida.

Vida nudar fila liman iha rotunda la fasil, tanba dalaruma Xefe Suku sira sempre mai hirus no husu atu labele faan iha fatin refere, maibe Feliciana laiha fatin alternativu seluk hodi faan nia sasan, ho nune’e nia kontinua faan iha rotunda, “sei hau la faan iha ne’e, atu ba faan fali iha ne’e, iha segunda dala-ruma hau la faan ida, tanba xefe suku mai duni hau”.

Inan feto nia kulit ne’ebe komesa namkurut tanba fator idade no karik mos tanba hanoin barak konaba moris todan ne’ebe nia tenke leba rasik, lakon kaben no lakon oan mane, halo Feliaciana laiha kbiit atu forsa. Ba Neon Metin nian matan wen turu tun, habokon nia hasan ne’ebe komesa namkurut, konfesa ba Neon Metin katak bainhira sira hahan laiha, nia vizinhu sira mak fo netik hahan ba sira hodi han, atu bele augenta ba moris loron aban nian.

Inan faluk ne’e mos ba jornalista Neon Metin tenik katak simu ona osan terseira idade nian, maibe ida ne’e la to’o hodi responde sira nia nesesidade uma laran, tanba iha fulan neen hotu mak foin simu osan $180.00.

Durante iha minute 30 nia laran, jornalista Neon Metin dada lia ho inan faluk Feliciana Mendonca, ema wain ba wain lao ba mai hodi sosa nia malus ka hahan sira seluk. Buah ho malus hirak ne’e ho folin $0.25 cen to’o $1.00 no mina forai butir kiik oan ho foin $5.00

Banihira inan faluk ne’e atu hakotu dada lia ho Neon Metin, nia tenik katak moris ne’ebe hatutan ne’e susar los, laiha ona forsa atu fila liman iha dalan ninin, maibe tan deit nia ho beoan, nia tenke bok an hodi hare sira.

Moris ne’ebe Feliciana halao, akontese mos ba Feliciana sira seluk ne’ebe mak tenke luta ba moris, laos husu ba nain ulun sira, maibe sira rasik hakaas an hodi goza oituan moris ne’e, maske la goza hanesan ema ne’ebe osan barak, maibe sira kontinua hikis kosar hodi dada iis netik iha loron ida nia laran. Bainhira mak povu sai husi mukit no kiak, bainhira estadu ne’e responde ona ezijensia povu nian ho diak.

Print Friendly, PDF & Email

LEAVE A REPLY

Please enter your comment!
Please enter your name here