Home Notisia PR Dekreta EE Dalima Kontinua Suspende Sirkulasaun Internasional

PR Dekreta EE Dalima Kontinua Suspende Sirkulasaun Internasional

764
0
Prezidente Republika, Dr. Francisco Guterres Lu Olo | 05.09.2020}

Reportazen Santina Lucia da Costa

Relasiona ho moras surtu COVID-19, ne’ebe sei kontinua afeta ba nasaun barak no liu-liu Timor-Leste ne’ebe hela ho Nusa Tenggara Timur (NTT) – Indonesia ho nune’e governu husu ba Prezidente Republika hodi dekreta Estadu Emerjensia (EE) dalima nian, hodi kontrola area fronteira rai, tasi no aero porto.

Ho nune’e iha loron 05/09 Prezidente Republika, Dr. Francisco Guterres Lu Olo deklara estadu emerjensia dalima, hodi suspende sirkulasaun internasional.

Liu husi mensajen Prezidente Republika hateten iha loron 6 Agostu liubá, hau hatoo mensajen ba povu tomak, katak tanba moras COVID-19, ita presiza moris fulan ida tan ho regras no medidas hatuur ho estadu emerjénsia no iha loron 4 Septembru, oras 23:59 kalan Estadu Emerjensia dahaat nian remata

Prezidente informa katak molok estadu emerjensia dahaat nian remata, governu hato’o proposta ba Prezidente Repúblika iha loron 27 Agostu 2020, atu deklara dala ida tan estadu emerjénsia ba territóriu nasional tomak durante loron 30.

Tuir Konstituisaun Prezidente Repúblika konsulta kedas Konsellu Estadu no Konsellu Superiór Defeza no Seguransa. Hafoin rona Konsellu rua ne’e, ne’ebé haforsa pedidu governu,  Prezidente Repúblika husu autorizasaun ba Parlamentu Nasionál iha Loron 1 Septembru 2020, ho autorizasaun husi Parlamentu Nasionál no ho kbiit Konstituisaun fó ba Prezidente Repúblika.

“Ha’u deklara Estadu Emerjénsia ba loron 30, hahú ohin loron 5  Septembru Sábadu, zero oras, no sei ramata iha Loron 4 Outubru 2020 domingu kalan,  tuku 23:59 iha teritoria tomak”, deklara Lu Olo

Lu-Olo hateten tanbasá ita kontinua ho estadu emerjénsia? tanba ida ne’e nudar medida preventiva ida, atu ita hasees-an husi moras COVID-19, hada’et ba komunidade husi sira ne’ebé tama-mai husi rai sira seluk, liuliu husi rai viziñu Indonézia no Austrália.

Lu-Olo afirma númeru kazu pozitivu konfirmadu sa’e liután iha ita-nia país viziñu. Loron-loron mosu tan kazu konfirmadu foun. Iha Austrália mate ona ema 600 resin. Mate ona iha Indonézia 7000 resin inklui iha NTT, provínsia ne’ebe halo fronteira ho Timor-Leste.

“Ha’u husu ba maluk sira hotu, atu tuir medidas estadu emerjénsia ne’ebé autoridade kompetente sira sei implementa. Husu mós ba entidade responsável sira atu fornese meius protesaun ba pesoál liña-oin no haree oinsá kontrola di’ak liután iha fronteira, aeroportu, portu, pontu entrada ne’ebé de’it no fatin-kuarentena, atu Covid-19 labele hada’et ba komunidade. Ita hotu tenke preokupa ho kondisoins servisu  di’ak ba pesoál liña oin, ne’ebé  servisu loron-kalan, hodi proteje ita hotu husi moras at ne’e.” informa Prezidente Republika iha Palásiu Prezidensial Nicolau Lobato, 5/09/20

Nia dehan, Enkuantu ita servisu hamutuk ba prevensaun  no kombate Covid-19, Governu Timor-Leste, nu’udar órgaun ezekutivu, buka mós dalan atu oinsá hasa’e dezenvolvimentu lalais liu, ho benefisíu ba Povu tomak. 

Lu-Olo hateten ho planu Rekuperasaun Ekonómika ba tempu badak, médiu no naruk, Prezidente fiar katak Timor ita sei la’o ba oin no organizadu liu, iha prosesu haburas lalais Timor-Leste no lori ita-nia Povu ba moris-di’ak! Maibé atu Timor-Leste buras babeibeik, ita presiza mós moris saudável.

‘Ha’u fó-hanoin fila-fali, Atu hadook-an duni husi Covid-19, ida-idak presiza haktuir medida preventiva tuir mai ne’e, uza máskara,  fase liman beibeik ho sabaun no hadook-an malu, metru ida ho balu.” apela Lu-Olo.

Xefe Estadu akresenta ho kuidadu sira ne’e mak ita hala’o ita-nia servisu loron-loron durante estadu emerjénsia ida ne’e. Instituisaun públika no privada, eskola, loja, merkadu, transporte no fatin públiku ne’e bé de’it sei la taka. Toos-nain no traballador ne’ebé de’it bele halo servisu baibain.

Print Friendly, PDF & Email

LEAVE A REPLY

Please enter your comment!
Please enter your name here