Reportajen David da Costa Gusmao
Ministériu Interior (MI) husu ekipa sira ne’ebé maka serbisu iha Bombeirus, atu kuidadu kareta sira ne’ebé ohin entrega husi kompañia Silas ba iha Sekretáriu Estadu Protesaun Silvil (SEPS), liu-liu ba iha ekipa Diresaun Nasionál Bombeirus nian, atu uza ho kuidadu hodi atende situasaun sira ne’ebé komunidade enfrenta.
Diretór Jerál Administrasaun Finansas Ministériu Interior (DJAF-MI), Mariano Araújo husu ba parte bombeirus atu kuidadu karreta sira ne’e, maski karreta sira ne’e sosa ho osan estadu nian, maibe ema ne’ebé maka uza tenke kuidadu nafatin sasán estadu nian.
“Hau hakarak hato’o rekomendasaun ba ita nian uzuarius sira liu-liu ba iha parte bombeirus nian, karreta sira ne’e uza ba no kuidadu sasán estadu nian, maske ita dehan katak orsamentu estadu nian, maibé ita uzuarius ka sasan na’in tenke uza ho kuidadu. Atu nune’e bele fasilita apoiu ba ita nia populasaun sira, liu-liu iha parte dezastre ne’ebé maka ita enfrenta hela agora ne’e,” dehan Mariano Araújo, iha edifísiu SEPS kaikoli, Segunda 21/02.
Iha fatin hanesan Diretór Nasionál Bombeirus, Claudio da Silva dehan kampaña Silas entrega hela viaturas mai iha Sekretáriu Estadu Protesaun Sivíl (SEPS) tanba konklui ona prosesu iha tinan 2021 nian, konaba prosesu kompras viaturas ba Diresaun Nasionál Bombeirus nian.
“Ne’e duni nia prosesu ne’e lao kuaze tinan ida, tanba iha situasaun Covid-19 no iha prosesu administrasaun sira seluk, maibe ohin loron kompañia kumpre ona saida mak nia asina iha kompromisu ne’e hodi ohin loron entrega ona viaturas ne’e mai iha SEPS,” esplika nia.
Orsamentu ne’ebé maka hola ba karreta sira, foti husi Orsamentu Jerál Estadu (OJE) tinan 2021 nian, ne’ebé alokadu ba iha diresaun Nasionál bombeirus por volta de 900 mill itál hodi bele kompras ba iha karus espesifiku ba iha bombeirus nian.
Entertantu kareta sira ne’ebé maka ohin kompañia Silas entrega hamutuk kareta 7, maka karreta Toyota Hilux 3, karreta Hino boot 1, no kiik 1 no kareta Mersedes 2.
