Reportajen Joselina dos Santos
Premiadu Nobel da Paz Dr. Jóse Manuel Ramos Horta agradese ba Organizasaun Junta Forsa Polítika, Aliadu Defende Direitu Demokrátiku (JFP-ADDD) no Xanana-Ramos Horta (XARA), tanba bele fo apoiu hodi kandidata a’an ba eleisaun Prezidénsial tinan 2022 no eleisaun Lejislativa 2023 nian.
“Ha’u Agradese tebes ba apoiu no konfiansa husi Timor oan barak no mos ba JFP-ADDD, UMDD no Grupu sira seluk, tanba ne’e ondra boot tebes ema ne’ebe polítiku hanoin duni sukat didiak, iha vontade no iha motivasaun iha matenek ho silénsiu atu simu todan ne’e,” Dehan Premio Nobel da Paz Dr. Jóse Ramos Horta iha Salaun Katedral, 14/01.
Lideransa ne’e dehan, nia halo reflesaun oituan iha fulan ne’e nia laran, no sei hein Prezidente da Republika anunsia hodi dekrera kalendariu eleitoral nian no marka data eleisaun.
“Ha’u sei koalia ho maun boot Xanana atu nune’e ohin aban ka bain rua, depois hamutuk ho maun boot Xanana halo reflesaun hodi bele kandidata-an, saida mak nia hakarak, to’o agora ha’u seidauk iha desizaun atu kandidata-an”, dehan Horta
Horta konklui katak haree mos kritériu ba kanditadu-an, partidu CNRT apoiu entaun nia konkorda, no sei asina mos kritériu ida ne’e tanba importante duni ba perfíl Prezidente nian.
