Home Saude 24% Feto Isin Rua Sedu no 19% Kaben Sedu Tanba Menus Konnesementu...

24% Feto Isin Rua Sedu no 19% Kaben Sedu Tanba Menus Konnesementu Konaba Saude Reprodutiva no Sexual

1059
0
Diretora MOFFE, Yasinta Lujina. [Foto: David da Costa | 12.03.2020]

Kontributor David, Nada, Adel, no Simplicio

Movimento Feto Foinsa’e [MOFFE] ne’ebe halo advokasi barak liu ba foinsa’e sira, bainhira contributor Neon Metin halo entrevista konaba kazu kaben ka isin rua sedu, liu hosi deklarasaun Sekretariu Estadu Arte no Kultura ne’ebe hakarak kria regulamentu ba joven sira ne’ebe kaben ka isin rua sedu.

Diretora MOFFE, Yasinta Lujina ba Neon Metin hateten se governu atu kria regulamentu hodi regula joven sira ne’ebe kaben no isin rua sedu ne’e kontra direitu umanu, maibe estadu tenke kria kondisaun, tanba joven balun laiha konesimentu ba saude reprodutiva.

“Ba ami nia servisu ami hare katak,  importante agora la’os atu haree katak bandu ema atu labele kaben sedu no isin rua sedu, maibe ami hanoin koñesementu kona ba saude reprodutiva nee mak sai hanesan problema bo’ot ba ita nia joven sira, liu liu ita nia sosiedade, familia dalabarak sira hanoin asuntu saude reprodutiva no saude sexual nee hanesan ladun importante ba oan sira no hanesan sensitivu atu koalia ba oan sira, maibe bandu kaben sedu no gravida sedu ita kontra ona direitu umanus”, dehan Jacinta Lusinha iha nia kna’ar fatin Kaikoli Dili.

Direktora ne’e mos esplika preokupasaun nee mosu, tamba soe bebe ne’ebe mak akontese hela de’it, maibe seidauk iha aktu katak joven mesak mak halo buat sira ne’e.

“Ema barak mak prekupa tamba issue soe bebe, ne’e mak implika maibe ita la buka nia abut husi problema  sira ne’e hanesan kondisaun sira ne’ebe prezudika foinsae sira mak halo. Ita mos lahate no ita seidauk iha dadus atu hatudu katak aktu sira ne’e ema joven sira mak halo, hau hanoin ita labele dun deit”, hateten direktora MOFFE

Tuir prespektiva MOFFE nian katak Estadu iha rekursu boot atu kria kondisaun ba ema hotu tamba joven balun laiha konesementu saude reprodutiva, tamba ne’e liu hosi programa Ministeriu Saude neebe iha, bele kontinua habelar informasaun sira liuliu iha eskola nivel suku ka komunidade sira.

Diretora nee mos konkorda se governu kria Lei atu bandu oinsa inan aman sira fo kaben oan sira ne’ebe sei idade kiik.

“Hau konkorda tamba dalabarak ita temi iha kultura mos ne’ebe obriga oan sira idade kiik tenke kaben, tamba barlake kultura no  ida ne’e mak tenke iha Lei bandu ,maibe atu kria bandu direita ba joven rasik labele kaben no gravida sedu ne’e direitu ema ida idak nia no isin lolon ida idak nia”, hateten Yasinta

Hosi relatoriu peskiza konaba kaben sedu no isin rua sedu hosi UNFPA no PLAN Internasional Maiu 201, hatudu katak 24% feto foinsa’e isin rua sedu [tinan 20 mai kraik] no 19% foinsa’e sira ne’ebe kaben sedu.

Hosi peskiza ne’e atu hatudu katak foinsa’e sira barak mak menus konnesementu konaba saude reprodutiva no edukasaun sexual, tanba ema sei hanoin ne’e hanesan tabu.

Editor: Zevonia Vieira

*[David, Nada, Adel no Simplicio nudar estudante UNTL, Ekipa Hosi Klinika Jurnalismu, ne’ebe realiza hosi UNESCO-UNTL]

LEAVE A REPLY

Please enter your comment!
Please enter your name here