Reportajen David da Costa
Kada tinan governu orsamentu $1.8 ba iha edukasaun, no osamentu ida ne’e Presidente Repúblika konsidera la sufisiente, nune’e presiza aloka orsamentu boot no tau prioridade ba edukasaun iha Timor-Leste.
Prezidente Repúblika (PR) José Ramos Horta, Governu liu husi Ministériu Edukasaun sektorál tenke haree didi’ak tau orsamentu bo’ot liu ba edukasaun, no tau prióridade ida ka númeru ida, orsamentu atu halo saida, hadia eskola sira iha Timor tomak, lalika luxu, halo kualidade iha sintina, hariis fatin, uma kakuluk labele kuak, haree tau internet iha ne’eba, tenke haree enfermeiru ida ka rua iha grupu eskola.
“Ho orsamentu ne’ebé kada tinan governu aloka ba edukasaun $1.8 de’it la sufisiente. Tamba ne’e Ita presiza eskola rihun rua to’o rihun tolu,” dehan Prezidente Repúblika José Ramos-Horta iha Eskola STM Becora, Kinta 19/09.
Xefe Estadu mos husu governu haree mós nutrisaun di’ak liu, mobiliza estudante sira hamutuk ho Direitór eskola atu kuda modo, kuda aifuan iha eskola fatin, buat sira ne’e tenke organiza didi’ak tau orsamentu. Nune’e mós tenke tau vensimentu di’ak ba professor sira, mas professor sira mós tenke hatene simu sira nia responsabilidade.
“Ha’u haree vensimentu professor sira nian ladun hanesan uluk, agora $ 300-400 ne’e di’ak ona uitoan, maibé se ita selu osan bo’ot ba deputadu sira, ba asesór sira, ba adidu ne’ebé ba Embaixada sira, entaun favór tau osan di’ak liu ba professor sira, liu-liu sira iha foho ne’e,” Xefe estadu esplika.
Xefe Estadu subliña tan, agora ho kambu sumbriñu atu mai tan iha Timor-Leste tenke lori dijtalizasaun ba eskola sira hotu-hotu iha Timor-Leste.
Antes ne’e Sua Santidade Papa Francisco mós hateten, Timor-Leste ne’e hanesan povu ida ne’ebé maka sei joven, tanba populasaun Timor-Leste 65% maka sei iha tinan 30 mai kraik ho ida ne’e presiza tebes investe iha edukasaun ba iha labarik no foin-sa’e sira.
“Ita-boot sira nư’udar povu ida ne’ebé joven, la’ós tanba imi-nia kultura no hela-fatin iha rai ida-ne’e, ne’ebé tuan tebes, maibé tanba por volta de 65% populasaun Timor-Leste nian mak tinan 30 mai kraik. Númeru ida-ne’e atu hateten mai ita katak domíniu dahuluk ne’ebé atu investe mak edukasaun, iha família no iha eskola,” dehan Sua Santidade Papa Francisco bainhira vizita Timor-Leste.
Edukasaun ida ne’ebé tau labarik no foin-sa’e sira hanesan sentru no promove sira-nia dignidade. Entuziazmu, buat di’ak, projesaun ba futuru, korajen, inisiativa, típiku foin-sa’e sira-nian, kombina ho esperiénsia no matenek katuas-ferik sira-nian, forma kombinasaun providensiál koñesimentu no impulsu jenerozu sira ba aban-bainrua. Entuziazmu ida-ne’e no matenek ida-ne’e, hamutuk, maka sai rekursu boot ida no la permite pasividade ka, menus liu, pesimizmu.
