Home Analisa Estudante NYU Protesta Henry Kissinger, Relatoriu Chega! Identifika Kissinger Involve Krimi Kontra...

Estudante NYU Protesta Henry Kissinger, Relatoriu Chega! Identifika Kissinger Involve Krimi Kontra Umanidade

235
0
Henry Kissinger hasoru malu ho Presidente Soeharto, 6 Dezembru 1975 (Foto: ETAN)

Estudante hosi Universidade Nova Iorke (New York University) ka NYU, Amerika, halo protesta hasoru Eis-Sekretariu Estadu Estadu Unidos Amerika nian, Henry Kissnger, iha eventu ida mak organiza iha universidade ne’e. Relatoriu Chega! identifika tiha ona Henry Kissinger ho Estadu Unidos nia involvementu iha invasaun no okupasaun Indonesia nian iha Timor-Leste.

Tuir notisia mak publika iha sitiu Democracy Now (https://democracynow.org) Iha Universidade Nova Iorke (NYU), protestador ida hakilar  ba Kissinger hodi hatete katak, “o (Kissinger.red) atu dehan mai hau katak o laos kriminozu funu nian, o labele tama komarka ba krimi ne’ebe o halo? O merese hatan ba krimi kontra umanidade! O merese tama komarka no depois ‘mutuk’ iha inferno! O halo tiha ona krimi hasoru Chile, hasoru Argentina, hasoru Kamboja, hasoru Vietnam! O kriminozu funu nian.” Estudante sira halo protesta hasoru Henry Kissinger, iha Tersa, 16/10.

Estudante ida hosi NYU,Madison Kelts, koalia iha fatin protesta nian bainhira Kissinger tama ba universidade hodi hatete katak Kissinger halo violensia masivu no oho ema barak.

“Durante nia tempu nudar Sekretariu Estadu no Asesor Seguransa Nasional, Henry Kissinger halo violensia masivu, krimi masivu, kontra ema iha Vietnam, hosi Laos ba to’o Kamboja, halo bombardiamentu sekreta. Nia ne’e advogador at imperialista funu nian mak presija responsabiliza ba saida mak nia halo, maibe nia seidauk responsabiliza ba ema rihun ba rihun no tokon ba tokon mak mate tiha ona.”

Kissinger serve nudar ema politika nain nivel aas ida iha tempu Presidente Nixon no mos Presidente Gerald Ford nian. Durante ninia mandate nia halo politika foer sira hodi apoio kampanna bombardiamentu iha Cambodia no Laos; Suporta funu naruk mak oho ema barak iha Vietnam; Suporta eskuadra oho ema nian hodi halo kudeta iha Amerika Latina, inklui iha Chile no Argentina; Apoio funu kontra movimentu libertasaun iha Angola no Mozambique, suporta genosidiu iha Pakistan no Bangladesh; no apoio politiku, finanseiru no lojistiku ba Indonesia hodi halo invasaun ba Timor-Leste hodi oho ema rihun atus rua resin.

Tuir relatoriu Chega! nian, Iha 6 Dezembru 1975, loron ida antes invazaun, Presidente Gerald Ford ho ninia Ministru Negosiu Estranjeiru, Henry Kissinger ba Jakarta. Tuir analiza CIA nian, sira halo prediksi katak invazaun sei akontese bainhira Presidente Ford fila ba Amerika. Iha loron hanesan Kissinger hatete katak utilizasaun armamentu Estadu Unidos nian iha operasaun militar hanesan ne’e bele sai problema maibe nia mos aumenta tan dehan, “ne’e depende oinsa mak ita defini: uza kilat ne’e ba defende ita nia an ka halo operasaun militar ba rai liur.”

Iha enkontru tempu badak nia laranne’e, parte Estadu Unidos hato’o sira nia aseitamentu ho Indonesia hodi anexa Timor-Leste ba Indonesia. Iha momentu ne’e Presidente Indonesia, Jenderal Soeharto hatete, “Ami husu ita bo’ot nia komprensaun bainhira ami seinte nesesariu hodi halo asaun lalais no drastiku.”

Presidente Geral Ford dehan, “Ami sei komprende no sei la tau kestaun ba buat ne’e. Ami komprende problema ne’ebe ita bo’ot hasoru no ita bo’ot nia intensaun.”

Bainhira hetan tiha apoio Internasional, Indonesia aprova desizaun ne’e iha enkontru Parlementu Indonesia nian. Nudar konsequensia ema 180,000 mak mate durante okupasaun tanba oho, moras no hamlaha. Ema 60,000 mak hetan oho iha tinan inisiu inavazaun nian, 18,000 resin mak disaparesidu, 4,000 mak hetan violasaun sexual, ma rihun atu ida resin mak deslokadu.

Tanba ne’e rekomendasaun importante balun hosi Relatorio Chega! nian husu responsabilidade hosi individu  no ka politika nain sira, no estadu sira mak apoio invazaun Indonesia nian. Relatorio ne’e temi momoos kona ba Estadu Unidos nia involvementu, inklui fo apoio politiku, finansiamentu no armamentu ba Indonesia hodi halo violasaun dereitus umanus iha Timor-Leste. Rekomendasaun Chega! nian mos husu atu nasaun sira mak apoio invazasaun no okupasaun Timor-Leste atu kontribui ba reparasaun.

LEAVE A REPLY

Please enter your comment!
Please enter your name here