Reportajen Adroaldo “Saretukau”
Profesora Ensinu Báziku Filial (EBF) Suku Leuro, Postu Lospalos-Lautem, Felicidade Fernandes hato’o preokupasaun eskola nian ne’ebé sei menus, kadeira no meza ba alunus sira, inklui sala de aula no mos sala biblioteka nian, ne’ebé difikulta tebes estudante sira iha prosesu aprendizajen.
“Ami nia edifísiu foun PNDS mak halo, maibé tanba meza, kadeira la iha, entaun ami uza 1 ho 2 Siklu nian, rajaun tanba sira 3 Siklu ne’e iha edifísiu foun maibé la iha kadeira, meza. Ne’ebé iha edifísiu tuan kadeira, meza la iha ona,” dehan Profesora Felicidade ba Neon Metin via telefone, Kinta-feira, 19/01.
Eskola refere presiza los meza, kadeira, aumenta tan sala, meza no armáriu ba profesores. Se bele karik aumenta tanba ami iha ne’e 3 Siklu mos inklui hotu ba iha EBF Leuro, tanba durante ne’e Paralelu Leuro ne’e seidauk iha edifísiu, ne’ebé sei uza hela 1 no 2 Siklu nian. Profesora ne’e mos husu, atu aumenta tan sala de aula, hodi kompleta ba segundu turnu nian tanba biblioteka sira uza ba 7 año tanba aula la to’o.
Iha parte sorin, sira rekomenda ba Ministériu Edukasaun atu sira nia eskola sai mos hanesan Ensinu Báziku Sentral Leuro, tanba agora da-dauk ne’e sira sei Paralelu. Iha EBF Leuro iha 3 Siklu Paralelu C, Paralelu D iha Cacavei, nune’e sira husu se karik sira nia eskola nia número Emis sai ona atu tama EBC, entaun aselera lalais.