Reportajen David da Costa
Ministériu Justisa (MJ), liuhusi nia Diresaun Nasionál Rejistu Notariadu (DNRN) sei koopera ho UNICEF, hodi tun ba iha Postu Administrativu iha territóriu Timor-Leste, hodi Imprime Billete Identidade (BI) no sertidaun Nascimento RDTL ba sidadaun sira hotu.
Ministru Justisa (MJ) Tiago Amaral hateten, Diresaun Nasionál Rejistu Notariadu (DNRN) ohin reuniaun hela ajensia internasionál UNICEF, para depois atu atende sertidaun Nascimento RDTL ho BI ba iha sidadaun sira hotu, agora Ministériu Justisa forma ona ekipa tolu atu ba iha parte Leste, parte rai klaran no mós parte oeste, atu ba halo imprime ba BI ho sertidaun moris ba sidadaun sira.
Tanbe ne’e, Funsionáriu Ministeriu Justisa no Notariadu nian sei tun ba iha kada postu Administrativu durante loron sanulu resin tolu ba toba iha kada Postu Administrativu para halo imprime BI no sertidaun RDTL ba sidadaun hotu-hotu ho gratuita labele selu. Ida ne’e, devér estadu nian fó ba nia sidadaun sira, iha 20 anos ona sidadaun barak seidauk iha BI no sertidaun moris ne’e labele, tanba sidadun hotu-hotu hahú husi bebe foin moris to’o otas saida deit iha direitu ba hetan sertidaun Nascimento RDTL no BI.
“Agora iha dekretu lei ezekusaun orsamentu aprova ona, lakleur tan eipa tolu ne’ebé MJ forma ne’e sei tun diretamente ba iha ita boot sira nia fatin, Tanba sidadun sira iha direitu para hetan kartaun Billete identidade (BI) ho sertidaun Nasimentu RDTL. Ho ida ne’e, MJ instrui ona ba iha Diretór notariadu sira iha Timor laran tomak, no agora ami reuniau hela, para depois hatun hela ekipa fulan oin ka fulan ida rua nia laran sei tun direita ba atende sidadun sira iha ida-idak nia postu administrativu,” dehan Ministru Justisa Tiago hafoin remata enkontru ho PM Taur, iha Palásiu Governu, Tersa 31/01.
Nia haktuir, iha kada postu administrative ne’e, sidadaun hotu-hotu iha suku no aldeia sei ba iha ida-dak nia postu Administrativu hodi bele foti BI no Sertidaun Nascimento RDTL no sira ne’ebé ferik katuas ona labele la’o, funsionariu Notariadu sira sei la’o to’o iha sira nia fatin. Tanba Ida ne’e maka politika no meus ne’ebé MJ uza atu resolve ba problema ne’ebé maka sempre mosu iha Notariadu.
Nia esplika, Antes ne’e Ministeriu Justisa halo ona iha kada postu Administrativu, hanesan Maubisse, Uatulari, Como, Atsabe, Lolotoe, Bobonaro, maibé orsamentu maka laiha no ekipamentu sira ne’e mós limitadu, ho ida ne’e kada postu Administrativu iha loron lima deit.
Maibe Agora tinan ida ne’e, maski ho mandatu ikus, maibe sei tun dala tan ho ekipa ne’ebé konjuntu husi Diresaun Nasional Notriadu nia staff no Ministériu Justisa nia staff, sei koopera ho administradór kada Munisipiu no postu administrativua nian hodi imprime BI no sertidaun Nascimento RDTL ba sidadaun sira.
Alende ne’e mós nia husu ba iha sidadaun sira hotu katak, iha ema ruma ne’ebé maka husu osan maka atu halo tratamentu ba iha Billete Identidade no sertidaun Nascimento RDTL nian, bele infroma mai iha Ministeriu Justisa para bele foti asaun lalais.