Reportajen Silvino Freitas
Ensino Basico Central (EBC) Ducurai ho kondisaun ne’ebé aat, fó ameasa ba estudante no professor sira iha tempu udan no anin bo’ot, tanba impaktu husi mudansa klimátika halo rai monu no eskola nakfera.
Diretór EBC Ducurai Antonio Soares haktuir, eskola ne’e hahú harii iha 2010 tanba ho impaktu husi rai-halai, halo kondisaun eskola nakfera hodi prejudika ba prosesu aprendizajen, tanba wainhira professor sira hanorin ho vontade ne’ebé trauma no la fo atensaun ne’ebé di’ak ba materia sira ne’ebé fó ba estudante sira.
“Iha tempu udan no anin estudante no professor sira trauma hotu tanba eskola tarutu hela de’it, tanba tauk eskola ne’ebé tarutu hela de’it iha tempu udan no anin makaas” dehan Diretór EBC Ducurai, (21/02).
Nia dehan, kondisaun eskola refere sira relata ona ba iha edukasaun munisipál, maibé to’o dadaun ne’e seidauk iha resposta maka posetivu no seidauk iha parte kompetente mak mai haree direita, maske eskola ne’e loronloron sempre hetan grave ne’ebé aumenta.
“Kondisaun eskola ne’e nia impaktu husi klíma udan been ne’ebé kontinua makaas, prejudika rai halai husi kraik” nia dehan.
Maske ho kondisaun eskola ne’ebé ameasa tebes maibé nafatin hala’o prosesu aprendizajen no labele hapara tanba estudante sira mós labele lakon sira nia direitu ba aprende, tanba bele halo menus konesimentu iha siénsia nian.
Irenia Maia Soares nu’udar estudante difisiente fiziku ho tinan 11 klase 5 ani hateten, maske ho kondisaun ne’ebé difisiente maibé nafatin mai eskola hodi aprende maske ho eskola no dalan ne’ebé fo ameasa ba sira nu’udar estudante.
“Hau iha kondisaun difisiente ain dezde hau moris mai hanesan ne’e tanba hakarak aprende entaun hau tenke mai eskola maske ami nia eskola ho kondisaun rai halai no fo ameasa mós mai ami nu’udar estudante” nia dehan.
Entretantu eskola ECB Ducurai sei menus konsensoens eskolares sira maka livru Lingua Portugues, Edukasaun Sivika no Tetun atu uza hodi hanorin ba estudante sira no totál estudante hamutuk 583 no professor 20 pesoas.
Nutisia ne’ebe Neon Metin Publika, nu’udar parte husi programa Media Tour ne’ebe organiza husi Oxfam iha Timor-Leste no Asosiasaun Jornalista Timor Lorosa’e (AJTL) liuhusi projetu Atavismu Ambientál, ne’ebe apoiu husi Oxfam Internasionál