Reportajen Silvino Freitas
Relasiona ho video ne’ebé virál iha média sosiál deskonfia Xefe Departamentu Medical Record Ospitál Nasionál Guido Valadares (HNGV), halo subornu sei hala’o servisu hanesan bain-bain, tanba seidauk iha parte ruma ne’ebé hato’o keixa, maibé iha ona prosesu investigasaun ba subornu no halo video.
Diretór HNGV Alito Soares hateten kona-ba video ne’ebé viral, nia mós akompaña liuhusi média sosiál, maibé to’o agora daudaun ne’e seidauk iha keixa ruma ne’ebé alegasaun ba subornu refere.
“Kona-ba video ne’e hau mós akompaña maibé ha’u mós hakarak hateten katak seidauk iha ema ruma ne’ebé hato’o keixa, no la koñese mós ida halo video kona-ba alegasaun subornu ne’e” dehan Alito iha HNGV,(10/03).
Nia dehan, investigasaun daudaun ne’e la’o hela husi parte KAK no Ministériu Saúde mós halo hela, ne’ebé sei iha hela prosesu nia laran, no ita sei hein nia rezultadu ne’e oinsá no HNGV iha regra ne’ebé iha, nune’e ema hotu tenke obedese ba iha regra ne’e kuandu la sala entaun lasala, maibé kuandu sala tenke asume responsabilidade ba alegasaun inklui ida halo virál.
“Ami nia staff sei hala’o servisu hela, tanba laiha ema ida dehan nia ne’e sala,” nia klarifika.
Tui nia, karta esplikasaun balun ne’ebé fó sai husi Konsellu Diretiva ba iha públiku, ne’e ema halo interpretasaun oin-oin iha média sosiál dehan pecat, maibé ne’e lalos tanba staff ne’e la halo sala ruma, no daudaun ne’e hala’o hela funsaun hanesan Xefe Departamentu Medical Record HNGV no la pecat hodi hein prosesu investigasaun.
Alito esplika liu tan katak, ema sira ne’ebé ho kondisaun saudavel atu halo medical check-up obrigatoriamente tenke selu tuir tabela presu ezaminasaun ne’ebé estabelese ona, tanba fasilidade sira ne’ebé estabelese iha medical record ne’e ba ema moras la’ós ema saudavel.