Reportajen Umbelin dos Reis
Konsellu Imprensa (KI), Comissão Nasional das Eleições (CNE) no Sekretariadu Tékniku Administrasaun Eleitorál (STAE), realiza workshop konaba propaganda polítika sira iha tempu kampaña eleitorál tinan 2023, ne’ebé sei mai ho tema “Reportajen balansu iha ámbitu eleisaun no kampaña polítika no mós evita propaganda polítika.” Iha ámbitu ne’e Konsellu Imprensa husu ba jornalista sira mantein kode étika jornalizmu nian, no servisu ho imparsiál, hodi lori informasaun kredivel ba populasaun.
Diretór Ezekutivu KI, Rigoberto Monteiro liu hosi nia diskursu hateten, objetivu hosi workshop ne’e oinsá hasa’e kapasidade jornalista profisionál iha tempu eleisaun no kampaña. Média agora hasoru movimentu iha área sosiál maka’as tebes, tanba ne’e mak kapasidade jornalista profisionál ne’e importante.
Nia dehan, Konsellu Imprensa simu ona karta ida hosi STAE, hodi kontinua organiza akreditasaun ba jornalista sira, wainhira halo kobertura ba eleisaun kampaña. “Jornalista sira sei servisu hamutuk ho STAE no CNE iha tempu eleisaun no kampaña to’o remata,” dehan Diretór Rigoberto iha Salaun Delta Nova, sexta-feira, 10/03.
Nia informa ba media sira katak tenke komprende di’ak papél hosi CNE no STAE nian, hodi nune’e fahe informasaun iha públiku la sala no labele falla. Konsellu Imprensa nia papel mais importante liu iha lei komunikasaun sosial, atribui ba dezenvolvimentu kapasidade no kompeténsia profesional, intelektual ba jornalista. Nia enkoraja jornalista sira katak uza matadalan reportajen ne’e ho di’ak ba iha prosesu eleisaun 2023.
Iha fatin hanesan Konselleiru Expedito Loro Dias Ximenes hateten tinan 2023 iha polítiku ba festa demokrasia, saída mak jornalista sai jornalista nia papél iha tinan demokrasia ne’e, ita hatene evolusaun dezenvolvimentu era dijitál, sidadaun la’os ona sai konsumidór ba informasaun ne’ebé sai hosi média konvensionál, maibé sira mós sai produtór rasik ba informasaun ne’ebé la’o iha sosiedade nia leet, tantu uluk sira sai de’it konsumidór.
“Uluk média konvensionál nia papél ne’e importante tebes, oinsá hala’o nia knaar tuir regra jornalístiku, maibé era dijitál dezenvolvimentu mosu plataforma oi-oin, entaun informasaun mosu la tuir ona regra ou étika jornalizmu nian,” nia dehan.
Nia informa katak, eleisaun parlamentár tinan 2023 ne’e kompetisaun entre partidu ne’ebé kandidata ba eleisaun parlamentár tuir informasaun ikus maski seidauk aprova hosi Tribunal Rekursu (TR), ne’ebé partidu 24 mak sei kompete ba eleisaun parlamentár tinan 2023.
“Hanesan média, meiu komunikasaun sosial, primeiru oinsá ita bele akompaña kampaña eleitoral no votasaun iha formasaun governu aban bainrua nian, maibé ita tenki kumpri nafatin kode étika jornalizmu nian wainhira tun iha terenu ba kobertura,” nia enkoraja jornalista sira.
Konsellu Imprensa fó sai ona manual mata dalan ba jornalista sira, nune’e kria nafatin ambiente armonia iha situasaun entre partidu politíku. Karik partidu politíku sira iha tempu kampaña iha liafuan kro’at ba malu, hanesan madiador entre partidu politíku no eleitores, ouvintes, bele hadi’a informasaun di’ak mak partila tutan ba populasaun, nia enkoraja tan.
Nia konklui katak, wainhira jornalista kaer metin kode étika jornalistiku mak sei la sai provokasaun ba ema seluk, kada pessoal jornalista iha partidu maibé labele lori partidu sai influénsia ba produtu jornalístiku ,maibé hanesan média tenke sai imparsialidade lori informasaun ba povu tomak.
