Reportajen Joselina dos Santos
Ekipa Feto Prontu Lidera (FPL), iha Sekretária Estadu Igualdade ba Inkluzaun (SEII) kolabora ho Grupu das Mulheres Parlamentares de Timor-Leste (GMPTL) servisu hamutuk ho Organizasaun sivil realiza Breafing ba Jornalista sira husi nedia nasional no media lokal hodi “Promove Jornalista Sensivel Jéneru” objetivu, atu hasa’e jornalista sira nia kapasidade, oinsá atu halo kobertura ba igualdade jéneru direitu feto no labarik feto hodi partisipa iha eleisaun.
Iha Workshop ne’e, Reprezentante Sekretária Estadu Igualdade ba Inkluzaun (SEII), Henrique da Silva hateten, objetivu husi Programa Feto Prontu Lidere ne’e oinsa atu kontinua iha futuru, tanba feto sira nia papel ka feto nia persentajem ne’e aumenta tan ba iha eleisaun sira, ho ida ne’e jornalista sira nia papel ne’e importante tebes iha konduta sosiedade nia leet nune’e jornalista mak hanesan matadalan ida hodi informa buat ne’ebe loos no justu ba sosiedade sira.
“Espera katak liuhosi media nia publikasaun ne’e ema bele sente katak Timor ne’e iha mudansa ka lae, tanba husi tinan ba tinan loron ba loron sempre mosu informasaun entaun atividade ida ne’e foka liu kona-ba promove jornalista sensivel jéneru, oinsa bele fahe informasaun ne’ebe kualidade no bainhira publika notisia ne’e labele hamosu diskriminasaun ba ita nia maluk sira no hatudu duni igualdade jéneru iha ita nia laran”, dehan, reprezentante SEII Henrique da Silva iha diskursu, iha salaun Tower Fatuhada, sexta 10/03.
Iha fatin hanesan, Fundadora Pátria Laura Pina hatutan, atividade ida ne’e realiza husi Ekipa Feto Prontu Lidera (FPL), grupu ida ne’e kompostu husi Organizasaun Naun-Governamental instituisaun governu nomós sosiedade sivil hamutuk hodi organiza sesaun Breafing ba jornalista sira ho topiku “Promove Jornalista ne’ebe Sensivel ba Jenéru” ne’ebe ho orador/a na’in3 lori materia lubuk ida ho nia konteudu atu reforsa mudansa mentalidade perspetiva jornalista sira nian ba iha promosaun igualdade jéneru.
“Ami kontente ba pesoál media sira husi Partidu Politiku ne’ebe iha Asuntu Parlamentar mos partisipa entaun pelumeus sira mos mai rona fali informasaun seluk husi parte sosiedade sivil nomós parte governu, atu hariku liu tan sira nia koñesimentu bainhira sira produz notisia ne’ebe sensivel ba ema hotu konsidera asuntu inkluzaun nomós responsivu katak responde ba iha espetasaun sosiedade nia hakatak atu haree notisia sira ne’ebe promove paz no estabilidade no respeitu direitu umanu” Nia Afirma.
Nia hatutan, Sira mesak kbiit lato’o atu fahe rekursu entaun presiza kopera ho jornalista sira husi media nasional no lokal tanba prezensa media hanesan pilar importante ida ba iha displinasaun informasaun edukativu atu hatutan informasaun ne’ebe fahe, sira bele hatutan fali sira nia media atu hamutuk hodi bele halao edukasaun sivika legadu ba iha promosaun kuda kultura foun hodi promove igualdade jéneru iha rai laran.
“Iha futuru ami sei nafatin kontinua programa sensibilizasaun ba to’o iha komunidade ka sosiedade tanba durante ne’e organizasaun lubuk ida nafatin halo aktividade to’o iha komunidade, maibe seidauk to’o nune’e presiza reforsa liu tan iha futuru programa sosializasaun no sensibilizasaun atu ema komprende kona-ba direitu umanu nomos direiru feto no labarik feto, oinsa sira bele ajuda atu bele iha igualdade jéneru ne’e hahú husi uma laran to’o komunidade”, nia esplika.
