Reportajen David da Costa
Prezidente Republika (PR), Dr. José Ramos-Horta fó parabéns ba Komandante Jerál Polisia Nasionál Timor-Leste (PNTL) foun, Henrique da Costa no Segundu Komandante Jerál PNTL foun, Pedro Belo, ne’ebé simu tomada de posse iha ámbitu loron aniversáriu Polisia Nasionál Timor-Leste nian ba dala 23.
“Ba Komandante Jerál no Segundu Komandante Jerál ha’u aprejenta ha’u nia votus ho fuan no laran,” hateten Prezidente bainhira halo diskursu iha serimónia aniversáriu PNTL nian ba dala 23 iha komandu UEF, Pairo-Pite, Segunda, 27/03.
Nia hatutan PNTL nia kna’ar ne’ebé todan, estadu entrega ba PNTL ho prinsípiu valor sira hanesan dixiplina, onra no devér. “Loron-loron iha imi nia kakutak, iha imi nia fuan, imi nia kurríkulu, professional akadémiku, profisionál imi nia istória servisu públiku hanesan promesa, garantia matenek kaer instituisaun PNTL ida ne’e ho valor as tebe-tebes ho apartidarizmu polítiku”.
Iha fatin hanesan Vise Ministru Interiór (MI) António Armindo, no reprezenta Primeiru Ministru no Ministru Interiór, fó kedas traballu Kaza prepara planu operasaun hodi asegura lala’ok eleisaun parlamentár 2023 hodi di’ak no hakmatek.
Governante ne’e sujere katak komesa alerta másimu no adopta toleransia zero ba kualkér aktus ne’ebé perturba orden públiku, karik tendénsia atu estraga povu iha festa demokrásia hodi eleza sira nia reprezentante iha uma Parlamentu Nasional
Nia dehan agora hakmatek iha instituisaun PNTL nia liman, di’ak liu evita envolve an iha partidu polítiku ,no halo polítiku prátika sira foku de’it ba kna’ar prinsipál serví de’it RDTL tuir Konstituisaun haruka no leal de’it ba nasaun RDTL no rona orientasaun husi Ministru Interiór.
Nia alerta katak labele iha kompromi ho kriminozu sira, se F-FDTL povu nia oan mane dahuluk, no PNTL povu nia oan mane ikus, tanba ne’e PNTL tenke leal ba konstituisaun RDTL haruka, hatudu sentidu estadu liu ba ema hotu sidadaun estranjeiru no sidadaun nasionál bele hetan protesaun no atendimentu públiku ne’ebé hakmatek sem diskriminasaun.
Nia konklui Komandante Jerál foun tenke atualiza-an ho dezafiu siklu 21 nian kriativu, proativa hodi mellora instituisaun PNTL nia performansia, tenke haburas kooperasaun instituisaun ho entidade seluk, tuir dekretu lei númeru 69/2022 kona-ba estatutu PNTL iha artigu 3 klaramente membru PNTL pensamentu ho komportamentu tenke reflete sentidu dixiplina no morál.