Reportajen Santina Lucia da Costa
“Kafetaria la’os de’it promove kafé lokál, maibé dada joven no estudante sira atu iha motivasaun hodi bele estuda no kria buat ne’eb’e kriativu liu tan”, Yunnita
Skyra Coffee Shop realiza konversa hamutuk ho Joven Potensial ho Tema “Joven nia Responsabilidade iha Dezenvolvimentu Nasaun” diskusaun ne’e hala’o iha salaun Skyra Coffee, Delta II.
Oradór ba Diskusaun ne’e mak, Eis-Sekretáriu Estado Formasaun Profisionál no Empregu, Nivio Mangalhães foka konaba partisipasaun Juventude iha Dezenvolvimentu, Prezidente Asosiasaun Jornalista Timor-Leste, (AJTL), hanesan mós feto Ativista ba igualdade jenesu, Zevonia Vieira, koalia kona-ba feto iha era-dijitál no artista, Alberto Piedade (BEPI), koalia kona-ba Transformasaun ho karakter juventude hodi kontribui ba dezenvolvimentu nasionál,
Hafoin diskusaun,Ba Neon Metin, nain ba Skyra Coffee Shop, Yunnita Godinho haktuir, atividade ida ne’e, desde uluk kedas bainhira harii Skyra Coffee mai ho konseitu ida study and chill, entaun momentu ne’eba tau livru mós iha kafeteria, tanba ema ne’ebé ba kafé la’os de’it ba hemu kafé, maibé aprende netik buat ruma, nune’e bele lee barak, tempu ne’eba tau livru ema barak entuziazmu lee.
Objetivu loke kafetaria la’os de’it promove kafé lokál, maibé dada joven no estudante sira atu iha motivasaun hodi bele estuda no kria buat ne’eb’e kriativu liu tan, hodi labele hein de’it oportunidade maibé mós kria oportunidade ba sira nia-an.
“Depois tinan lao ba dadaun, iha hau nia hanoin konseitu ne’e tenki iha nafatin, hau nia konseitu ne’e la hanesan ho kafetaria sira seluk, entaun hamosu tan ideia katak, ema barak gosta lee no la gosta lee, ema barak liu gosta rona, to’o iha ne’e hamosu pergunta, iha ne’e hamosu ideia koko took halo talkshow hanesan konversa ki’ikoan ruma iha kafé bolu ema ne’ebé iha esperiénsia barak nune’e bele fahe esperiensia hodi inspira fali joven seluk.” Hatutan, Owner of Skyra Coffee Shop, Yunnita Godinho, Sabadu, 25/03.
Nain ba Sykra ne’e informa mos katak iha atividade konserva dahuluk nian foka konaba Negosiu no bolsu estudu, joven barak partisipa, entaun hanoin konseitu ne’ebé halo konsege susesu. Hafoin remata seminariu ne’e, hamosu tan diskusaun atu halo tan seminariu segundu.
Nia dehan, seminariu segundu konsege realiza tanba Joven potensiál na’in tolu mak, Nivio Mangalhães hanesan Eis-SEFOPE, Alberto Piedade (BEPI) hanesan, Host, Artista no Zevonia Vieira hanesan jornalista no ativista. Sira na’in tolu koalia liu kona-ba Joven nia responsabilidade iha Dezenvolvimentu nasaun.
Nia realsa, atividade ne’e realiza la hetan fundus ruma husi ema, hanesan joven kontribui de’it saida mak ita bele halo, halo de’it, ohin loron kontente loos tanba joven barak entuziazmu partisipa iha Konversa ne’e.
“Liuhusi ida ne’e hau fiar katak, konseitu ne’ebé hau halo Study and chill ne’e susesu duni, tanba hau nia konseitu ne’e ema mai laos atu hemu de’it kafé maibé aprende netik buat ruma. No semana tuir mai sei iha tan diálogu.” Dehan,Yunnita Godinho.
Nia akresenta, Nu’udar joven ita la presiza hakilar ba governu atu halo buat ruma, joven bele ona atu hahú buat ida.
“Sé ita mak hakilar hela ba Governu halo saida ba ami joven, ne’e hanesan buat ida karik ita depende de’it ba governu, hanesan kampu de traballu, ita dala bark hakilar hela de’it ba governu katak, kampu de traballu laiha, maibé ita haluha tiha katak, ita bele kria rasik kampu de traballu ba ita nia-an, no bele mós fó kampu de traballu ba ema seluk. Maski la buat boot, maibé kontribui ona ba nasaun hodi la hakilar ba Governu. Hanesan joven no raan manas, book-an moris no badinas.” Tenik Yunnita.
Partisipante iha diskusaun ne’e mai husi, Joven Feto-mane ne’ebé eskola iha Universitáriu sira, joven pintura, ativista no seluk tan.
