Reportajen David da Costa
Relasiona ho Prezidente Repúblika (PR), Dr. José Ramos-Horta veta alterasaun dalimak bá Lei númeru 6/2006 kona-bá Lei eleitorál, no haruka fila ba iha Parlamentu Nasionál (PN), atu halo votu de konfirmasaun, maibé to’o agora Xefe Estadu seidauk simu fali lei eleitorál husi Parlamentu Nasionál.
“Ha’u seidauk simu buat ida, seidauk haruka mai ha’u,” dehan Prezidente Republika ba jornalista sira, bainhira partisipa iha serimónia aniversáriu PNTL nian ba dala 23 iha edifísiu komandu UEP, Bairo-Pite, Segunda, 27/03.
Nia haktuir maibé sira haruka karta ida mai, mas karta ne’e hateten de’it kona-ba votasaun ne’ebé akontese, laiha maioria dois tersus, ida ne’e karta de’it tanba karta ne’e rasik hateten, laiha maioria dois tersus atu konfirma kona-ba lei ne’e.
Entretantu, iha loron 20 Marsu 2023 Parlamentu Nasionál (PN), liuhusi reuniaun plenária fó ona votu konfirmasaun ba dekretu númeru 78/V PN alterasaun dalimak lei númeru 6/2006, 28 Dezembru lei eleitorál ba PN, hodi haruka fila-fali ba Prezidente Repúblika atu hetan promulgasaun.
Iha votu konfirmasaun nova apresiasaun diploma ka dekretu 78/V PN alterasaun dalimak lei númeru 6/2006, 28 Dezembru Lei Eleitorál ba Parlamentu Nasionál ho rezultadu votasaun afavór 37, kontra 22, abstensaun rua, ho ida ne’e dekretu númeru ne’e haree tuir artigu 88 númeru 3, vezes superiór maioria absoluta dos deputados em efetivu funsaun, para konfirmasaun diploma, tuir artigu ne’e meza deklara dekretu ne’e konfirmadu, nune’e meza sei envia hikas dekretu ne’e ba Prezidente Repúblika.
