Reportajen David da Costa
Governu liuhusi Komisaun Regulador ba Arte Marsiál (KRAM), apoiu orsamentu ba Organizasaun Arte Marsiais (OAM) hamutuk $2.5 miloens. Apoiu hirak ne’e, atu halo dezenvolvimentu ba organizasaun Arte Marsiais 16 iha Timor-Leste.
Prezidente Komisaun Regulador ba Arte Marsiál (KRAM), Fernando da Costa “Ato Lekinawa” hateten, Oorganizasaun Arte Marsial hotu hetan apoiu fundus ne’e, nune’e sira bele halo dezenvolvimentu ba iha idak-idak nia organizasaun.
“Ohin ita halo ona serimónia simbólika hodi atribui fundus ba organizasaun arte marsial sira, tuir akordu ne’ebé maka iha, Fundu ida ne’e hanesan imi hotu hatene, fó osan 2.5 miloens, osan ida ne’e tau ba iha dezenvolvimentu organizasaun arte marsial 16 ne’e hotu, balun federativa no balun organizasaun,”dehan Prezidente KRAM “Ato Lekinawa” bainhira partisipa iha lansamentu ba distribuisaun fundus dezenvolvimentu OAM no deklarasaun dame husi OAM ba eleisaun parlamentár 2023, Kinta 13/04.
Nia haktuir, orsamentu ne’ebé maka apoiu ba iha Organizasaun Arte Marsial iha komponte lima maka hanesan organizasaun atu jere di’ak liu tan nia membru sira, oraganizasun atu halo rezensamentu ba membru hotu-hotu, fó formasaun ba sira treinadores, halo kompetisaun ba OAM hotu-hotu, no ikus maka halo sede OAM. Tanba ne’e Oraganizasaun Arte Marsiais hotu-hotu iha Timor-Leste merese atu hetan apoiu hira ne’e hotu.
“Kada organizasaun hetan osan hira ne’e, Hau labele dehan detailiu, maibé hau bele dehan nia jerál, só organizasaun ne’ebé maka membru barak liu, hanesan IKS-TL, PSHT-TL, no Korka, kada organizasaun ne’e hetan 300 mil ital no kiik liu maka judo nia hetan 70 mil ital,” nia esplika.
Iha fatin hanesan, Prezidente IKS-TL, Silvestre Sufa haktuir, Organizasaun Arte Marsial IKS-TL sente haksolok loos, tanba governu nia hanoin di’ak hodi apoiu osan ba kada organizasaun hotu, atu nune’e bele dezenvolimentu di’ak liutan Organizasaun sira ne’e ba iha futuru no moderniza Organizasaun liuhusi administrtativamente, atu nune’e organizasun bele kria sede, organizasaun bele ativamentemente hodi korespondente di’ak liutan ho estadu.
“Bainhira koalia konaba organizasaun ita tenke iha sede ne’ebé maka serteja, tanba ida ne’e maka governu fasilita orsamentu ne’e, atu bele halo dezenvolvimentu ba Oraganizasaun Arte Marsial hodi halo sede, fó formasaun ba treinadór, loke kompetisaun iha lokál no mai iha Nasionál. Tanba ne’e maka orsamentu ne’ebé IKS-TL simu ne’e hamutuk 335 mil, no sei halo bai ha komponente lima ne’ebé Prezidente KRAM koalia ne’e” nia hateten.
Nune’e mos Prezidente PSHT-TL, Baltazar Lemos, agradese ba governu ida ne’e, tanba iha hanoin di’ak ba Oraganizasaun Arte Marsiais hotu iha Timor-Leste, hodi bele apoiu osan atu halo dezenvolve ba kada organizasaun ne’ebé maka iha Timor. Tanba Organizasaun Arte Marsiais mos hanesan rikusoin Timor nian, liliu Arte Marsial ne’ebé rejistu ona iha notariadu.
“Ami garante katak ba oin governu tau matan nafatin para Arte Marsial iha Timor ne’e bele buras liu tan no sai mos hanesan nasaun seluk. Osan ne’ebé ami simu hamutuk US $ 339 mill, no sei halo ba sede PSHT-TL nian,” tenik nia.
Entertantu Atleta sira ne’ebé ohin partisipa iha lansamentu ba distribuisaun fundus dezenvolvimentu OAM no deklarasaun dame husi OAM ba eleisaun parlamentár 2023 maka Shorinji Kempo, Karate-Do, Padjadjaran, Muay Thay, Preisi Diri, THS-THM, Boxe-TL, Wushu, Korak, Festil, Judo, Kaido, PSHT-TL, Taekowond, Iks-TL, Sinar Putih, no Seruling Dewata.