Reportajen David da Costa
Polisia Nasionál Timor-Leste (PNTL) husu ba Organizasaun Arte Marsiais (OAM) iha Timor-Leste, hamutuk ho PNTL sira, hodi asegura seguransa ba komunidade sira iha kampaña eleitorál no iha eleisaun parlamentár iha 21 Maiu, atu nune komunidade sira bele sente seguru no hakmatek, hodi ezerse sira nia direitu iha loron eleisaun parlamentár tinan ne’e.
Segundu Komandante Polisia Nasionál Timor-Leste (PNTL), Pedro Belo, hateten, iha tempu badak nia laran tama ona ba kampaña eleitorál, no eleisaun parlamentár. No PNTL hanesan forsa seguransa ida ho misaun atu defende legalidade demokratiku, garantia seguransa ba sidadaun sira nia tuir termu ne’ebé estabelese iha konstituisaun RDTL no iha lei sira seluk.
“Tanba ne’e atu asegura seguransa ba iha territóriu Timor laran tomak, hau lori PNTL nia naran konvida maluk sira ne’ebé haknar-an iha organizasaun Arte Marsial atu hamutuk ho PNTL ita fó seguransa ba ita nia komunidade durante kampaña eleitorál, eleisaun no depois de eleisaun parlamentár”, Segundu Komandante PNTL, Pedro Belo husu ba OAM, bainhira partisipa iha lansamentu ba distribuisaun fundus dezenvolvimentu OAM no deklarasaun dame husi OAM ba eleisaun parlamentár 2023, iha GMT Dili, Kinta 13/04.
Tanba ne’e husu ba Organizasaun Arte Marsial sira hotu, mai servisu makaas no hadook an husi violensia durante kampaña eleitorál no eleisaun parlamentár. Tanba rai ida ne’e hakmatek konta mos Organizasaun Arte Marsiais nia kontribuisaun
Iha fatin hanesan, Prezidente PSHT-TL, Baltazar Lemos, hateten, Arte Marsiais nu’udar umanu, ema Timoroan tenke iha konsensia atu mantein nafatin seguransa iha nasaun liuliu ba preparasaun iha elisaun parlamentár ne’ebé maka sei halo iha fulan oin ne’e.
“Hau nia mensajen ba Organizasaun Arte Marsial sira iha Timor-Leste, mantein seguransa iha ita nia nasaun, liuliu ba preparasaun eleisaun parlamentár nian,” nia husu ba Arte Marsiais sira hotu. Nune’e mós Prezidente IKS-TL, Silvestre Sufa, husu ba membru IKS-TL, tenke kontribui ba pás, estabilidade iha kampaña eleitorál no iha eleisaun parlamentár, tanba laiha tempu ona para Organizasaun Arte Marsiais sira halo problema.
“Liuhusi faktu unidade ne’ebé ami ohin asina ona, hau apela deit ba IKS-TL, labele koko tan halo krime, no IKS sei la tolera ba ema pessoal ne’ebé hamate organizasaun, se maka halo krime hatan rasik ninia, ita lakohi halimar tan. Tanba ne’e husu IKS tenke kontribui ba pás no dame iha eleisaun parlamentar,” nia haktuir.
