Reportajen David da Costa
Atu garante ba iha eleisaun Parlamentár 2023 ho pás no iha estabilidade iha Timor-Leste, ohin Organizasaun Arte Marsial (OAM) sira halo ona deklarasaun katak Organizasaun Arte Marsial sei kontinua luta ba prevensaun konflitu ho violénsia, harii no hametin Dame iha komunidade, no Hakribi violénsia ho forma saida de’it.
Portavoz Organizasaun Arte Marsial (OAM) no Prezidente Federasaun Silat Timor-Leste (FESTIL), Hermenegildo Custódio da Silva iha deklarasaun Dame ne’e dehan, OAM sei respeita no hakru’uk bá Lei Inan Konstituisaun Repúblika Demokrátika Timor-Leste (K-RDTL), ba erói no eroína sira mak mate no fakar ran ona ba luta ukun rasik an nian, ba prinsipiu no valór sira iha país ida-ne’e.
Tanba iha Organizasaun Arte Marsial ida-idak hahi no halo tuir, ho nune’e deklara katak OAM sei respeita liberdade espresaun no direitu sivil no politíku sidadaun ida-idak nian, liu-liu membru organizasaun arte Marsial sira nian, no kontinua ezerse direitu hirak ne’e iha eleisaun Parlamentár nian tuir dalan ne’ebé Dame.
No atu valoriza diversidade Organizasaun Arte Marsial ida-idak nia fiar ba tradisaun no kultura organizasaun nian, inklui Organizasaun Arte Rituál sira hotu iha teritóriu Timor-Leste laran tomak.
“OAM sei kontinua luta ba prevensaun konflitu ho violénsia, harii no hametin Dame iha komunidade. Hakribi violénsia ho forma saida de’it. Habelar tradisaun dame nahe biti boot tuir kultura no lisan Timor nian. Ezerse ami nia direitu demokrátiku tuir dalan dame nian, la monu ba lasu no lia bobar sira ne’ebé nakonu ho tendénsia perturba órden públiku,”dehan Hermenegildo Custódio da Silva iha Deklarasaun Dame, iha GMT Díli, Kinta 13/04.
Nia haktuir tan,Organizasaun Arte Marsiais sei la involve ka afilia bá kualkér partidu politiku no kontinua mantein indepedénsia no imparsialiadade. Tanba ne’e, OAM Prontu koopera ho lider komunitária, PNTL, STAE no CNE, nomós KRAM hodi buka solusaun ba konflitu ka violénsia ne’ebé Involve membru Oraganizasaun Arte Marsiais.
“Tanba ne’e, Organizasaun Arte Marsiais ne’ebé afiliasaun internasionál no moris ona ho valór no prinsipiu nobre ba umanidade nian, ami kontinua iha komitmentu atu fó susesu ba eleisaun parlamentár 2023 nian. Sei hakas an liután hodi mantein situasaun dame iha ami hotu nia komunidade no Organizasaun Artes Marsiais sira,” nia afirma.
Nune’e mós Prezidente Komisaun Reguladora Arte Marsiais (KRAM), Fernando da Costa “Ato Lekinawa” dehan ohin KRAM hamutuk ho Organizasaun Arte Marsiais hotu halo deklarasaun dame ba eleisaun parlamentár 2023, tanba kada eleisaun ema hotu sempre hanoin katak problema iha arte marsiais no ida ne’e la’ós ona segredu, tanba iha públiku membru balun afilia ba partidu ida, no balun ba seluk ne’ebé bele hamosu provokasaun bele lori ema ba hamosu konflitu no violénsia.
“Ohin ita hamutuk ho OMS halo deklarasaun dame ba iha eleisaun Parlamentár nian. Ita hakarak hamutuk ho OAM sira halo apelu ba públiku atu bele ba to’o iha membru sira, nune’e iha eleisaun konaba provokasaun, violénsia no konflitu ne’ebé sempre liga ho Arte Marsiais bele redús,” nia haktuir.
Entertantu Organizasaun Arte Marsiais (OAM) ne’ebé ohin halo deklarasaun Dame iha ne’e maka hanesan, Persaudaran Setia Hati Terate (PSTH), Ikatan Kera sakti-Putra Timar-Leste (IKPS-PTL), Kmanek Oan Raik Laran (KORK), Perisai Diri Silat Timor-Leste, Federasaun Taekwondo Timor-Leste, Federasaun Shorinji Kempo, Federasaun AlKIDO, Federasaun Boxe Amadora Timor-Leste, Federasaun Muay Thai Timor-Leste, Asosíasaun Silat Padjadjaran Nasional, Sinar Putih, Gerbawasik, THS-THM, Federasaun Wushu, Federasaun Karate-do, Federasaun Judo, Seruling Dewata, Federasaun Silat Timor-Leste.
