Reportajen Silvino Freitas
Konsellu Imprensa (KI) Timor-Leste konsidera prezensa jornalizmu sidadania sira nian importante tebes iha prosesu divulgasaun informasaun, nune sira tenke estabelese rasik média plataforma online, hodi hetan protesaun legál husi Konsellu Imprensa.
Prezidente KI Otelio Ote hateten, Konsellu Imprensa sente katak jornalizmu sidadania importante tebes tanba nia mós sai parte ida husi komunidade ne’ebé bele dizemina informasaun iha area hotu-hotu, tanba iha rai laran iha ona média konvensionál ho nia jornalista sira nune’e más presiza atu eleva jornalizmu sidadania sira husi parte ida luta ba dizemina informasaun komunidade nia le’et to’o area rurais sira.
“Konsellu imprensa ninia atensaun prioridade liu ba iha jornalizmu konvensionál ne’ebé iha ona nia legalidade, entaun jornalizmu sidadania hanesan grupu ida husi sidadaun balun ne’ebé iha interese mós atu partisipa iha prosesu divulgasaun informasaun sira iha direitu atu bele ezerse opiniaun no espresaun” dehan Otelio iha salaun CNC Balide, (08/05).
Nia dehan, konsellu imprensa koko nafatin atu iha futuru liuhusi asosiasaun jornalista sira bele ajuda jornalizmu sidadania sira hodi dezenvolve sira nia abilidade tekniku bele kolekta informasaun, hakerek informasaun, edita informasaun no publika informasaun ho didi’ak, maibé husi parte konsellu imprensa seidauk hatama sira hanesan parseiru legál ho konsellu imprensa, tanba iha difinisaun kona-ba jornalista maka ema sira ne’ebé servisu lorloron buka, halibur, edita no publika informasaun ba públiku liuhusi meiu komunikasaun sosiál sira ne’ebé legál.
“Kodigu konduta ne’e produz husi jornalista rasik liuhusi organizasaun jornalista sira iha tinan hirak liu ba, maibé karik sira hakarak tama iha komunidade ida ne’e hodi bele ezerse no implementa entaun sira tenke hakbesik ba organizasaun jornalista sira, hodi husu espasu karik sira hakarak sai membru, no di’ak liu maka sira estabelese rasik média rasik ba sira ho plataforma online ne’e sira bele adere kedas mai kodigu etika jornalista no lei komunikasaun sosiál atu hetan protesaun legál husi konsellu imprensa” Prezidente KI Otelio rekomenda.