Reportajen Silvino Freitas
Asosiasaun Jornalista Timor Leste (AJTL) Realiza Konferénsia Nasionál hodi kapasita joven no estudante sira hodi sai jornalizmu sidadaun atu hala’o atividade jornalista nian liga ba iha advokasia ba direitu umanu ema ho defisiénsia feto no labarik feto nian, nune’e mós ema ho difisensia tilun sira nafatin preokupa informasaun balun ne’ebé sira la asesu.
Prezidente AJTL Zevonia Vieira hateten programa citizen journalism ne’e foka liubá halo advokasia, oinsá sidadaun sira mak hanesan estudantes, grupu ka movementu sira halo atividade jurnalistiku, hodi hare ba asuntu sosial sira, liu-liu fo spasu ba lian kbiit laek sira, hodi hato’o sira nia espresaun, tanba ne’e parte husi atividade advokasia.
“Atividade ne’e lori joven no estudante halo atividade jornalistiku ba iha asuntu importante sira hanesan, diretu umanu, ema ho difisiensia nian asuntu feto nian, ne’ebé sai advokasia importante iha Timor Leste hodi promove eleisaun ne’ebé inkluzivu” dehan Zevonia iha Salaun CNC Balide,(08/05).
Nia dehan, AJTL nafatin halo kooperasaun ho PPMN hodi realiza konferensia nasional no lori orador sira husi Indonesia nomós Timor Leste hodi koalia kona-ba perspetiva direitu umanu nian, liga ba servisu jornalizmu sidadania ba iha promove eleisaun ne’ebé inkluzivu iha tinan 2023.
“Konferénsia loron ohin no aban sei iha treinamentu no diskusaun grupu ho radiu komunidade balun ho mídia-online no estudante sira, hodi hetan rekomendasaun ba atividade ne’e kontinua ba tinan naruk nian iha Timor Leste” nia dehan.
Zevonia fundamenta treinamentu ne’ebe sei halo tuir mai sei foka liu ba digital an physical safety ba citizens journalists sira, nune sira mos iha abilidade no koñesimentu konaba mundu jurnalismu nian
Fatin hanesan tradutora lian jestual husi Klibur Difisiensia Tilun Timor Leste, Deonisia Paula de Deus hateten, liuhusi konferénsia ne’e iha oradór balun ne’ebé hato’o ona sira nia intervensaun nune’e husi ema ho difisénsia sira preokupa liu maka imformasaun tanba informasaun barak maka ema ho difisiénsia sira la asesu.
“Hanesan husi PDHJ mós tau importánsia ba ema ho difisensia tilun sira atu asesu ba informasaun sira hanesan ne’e liuliu iha eleisaun ida agora ne’e, informasaun sira ne’e maka hanesan edukasaun sivika lei eleitorál sira ida ema ho difisiensia tilun menus tebes atu asesu ba informasaun sira ne’e” dehan Deonisia.
Nia konklui, konferénsia ne’e liga liu ba jornalista nia papél bainhira hala’o kobertura hodi buka informasaun sira tau iha média ho inkluzivu ba ema ho difisiénsia sira.
