Reportajen Joselina dos Santos
Autoridade Protesaun Sivil (APC), liuhosi Gabinete Relasaun Externa no Komunikasaun atualiza informasaun kona-ba akontesimentu Dezastre Naturais ne’ebé akantese Timor-Leste, durante semana ida hahu hosi loron 2 to’o 8 fulan maiu 2023. Husi Dezastre Naturais ne’e estragus komunidade nia uma hamutuk 31, nune’e husu ba komunidade sira atu kuidadu aan liu-liu labarik sira tanba udan boot sei mai nafatin no la espera liu-liu ba hirak ne’ebé hela iha mota ninin.
Liuhusi Konferensia Imprensa ne’e, Diretór Gabinete Relasaun Externa no komunikasaun Anacletu Caitano hatete, hosi autoridade Protesaun Sivil atualiza informasaun kona-ba akontesimentu Dezastre Naturais ne’ebé akantese durante semana ida ne’ebé hahu hosi dia 02/05/2023-08-05/2023.
“Tipu Dezastre ne’ebé akontese hosi loron 2 to’o 8 fulan maiu ne’e, iha tipu tolu mak hanesan inundasaun, Anin boot no Rai halai. Tuir ita haree hosi grafiku akontesimentu tipu tolu ne’e barak liu maka inundasaun, iha semana liu-ba akontese anin boot maibé semana ida ne’e la’os ona anin boot maibé inundasaun ka bee sa’e signifika udan maka’as iha fatin tetuk sira, hodi estragus komunidade nia uma,” Dehan Diretór Gabinete Relasaun Externa no komunikasaun Anacletu Caitano, liuhosi Konferensia Imprensa iha Salaun APC Kaikoli, Segunda 08/05.
Nia dehan, Total dadus ne’ebé Autoridade Protesaun Sivil simu durante semana ida ne’e hamutuk uma tolu-nulu resin ida (31) mak sai afeitada boot liu inundasaun, iha parte daruak mak anin boot sobu uma rua no Rai halai. Purtantu hosi tipu tolu ne’e akontese iha munisipiu lima mak hanesan, Baucau, Covalima, Viqueque, no RAEOA.
“Iha Munisipiu Baukau, Postu-Administrativu Baguia, Suku Larisula, Aldeia Bubu-Ha akontese iha loron 2 fualan maiu 2023 ne’e, akontese udan boot mota tun entaun lori ita nia alin ho idade 17 anos. Iha Munisipiu Baucau la iha estragus uma ruma maibé informasaun ami simu mak alin ne’e lakon vida”, nia informa.
Enkuantu iha munisipiu Covalima Postu-Administrativu Zumalai Suku Raimea Aldeia Uma Claran ne’e, iha loron 27 fulan Abril 2023 akontese inundasaun uma sanulu-resin hitu (17) mak sai afeitada. Iha munisipiu Viqueque Suku Makadike Aldeia Coquilaco, iha loron 27 fulan Abril 2023 akontese inundasaun estraga komunidade nia uma tolu tanba udan boot. Iha suku Babulo Aldeia Roma iha loron 25 fulan Abril 2023 akontese Rai halai estraga komunidade nia uma ida, kauza hosi udan boot.
Iha Postu-Administrativu Viqueque Vila Suku Bahalarauain Aldei Aidac iha loron 3 fulan maiu 2023, akontese anin boot no sobu komunidade nia uma ida, iha suku Waimori Aldeia Uatulesu iha loron 7 fulan maiu 2023 akontese mos udan boot, nune’e sidadaun ida lakon vida ho idade 50 anos. Iha munisipiu RAEOA iha suku Bobometo Aldei Nianapu iha loron 2 fulan maiu 2023 akontese anin boot no sobu komunidade nia uma ida.
“Hosi munisipiu ha’at ho RAEOA ne’e hosi munisipiu tolu mak hetan ona apoiu, maibé hosi munisipiu Baucau seidauk fó apoiu, dadaun ne’e ekipa sira iha terenu halo hela levantamentu ba dadus, halo asosiamentu atu nune’e bele fó apoiu emerjénsia, hosi tipu Dezastre tolu ne’e apoiu emergensia hosi parte Autoridade Protesaun Sivil munisipal sei halo verifikasaun hodi fó apoiu emerjénsia no munisipiu rua sei iha prosesu levantementu ba dadus atu bele fó apoiu,” nia esplika.
