Reportajen David da Costa
Kaza Sivíl Prezidénsia Repúblika, Bendito Freitas assina akordu ho CARE Internasionál, ne’ebe foka liu ba hadia edukasaun infantíl, nutrisaun labarik no feto nia estatutu ekonomia iha area rurais, no remotas iha rai-laran, durante tinan rua
Xefe Kaza Sivíl Prezidénsia Repúblika hateten atividade ne’e importante tebes, atu refleta partisipasaun Prezidente da Republika, tanba mandatu Prezidente Republika atu refleta ba programa ne’ebé maka Prezidente Republika preokupa hanesan edukasaun, saude, nutrisaun no mós dezenvolvimentu empoderamentu ekonomiku feto ninia, tanba ne’e maka ohin CARE mai iha ne’e atu nune’e bele promove no asina Memoriandu ida ne’e, hodi bele servisu hamutuk ba iha periodu tinan rua ninia.
“Husi parte ita nia servisu hamutuk ho CARE parseria ne’e lao diak liutan, i promve edukasaun, Saude, nomós empoderamentu ba ekonomia feto nian,” dehan Xefe Kaza Sivíl Prezidente Republika hafoin Asina Akordu ho CARE Internasionál iha Palásiu Prezidente Bairo-Pite, Sexta 3/02.
Diretor CARE Internasionál, Peter Goodfellow hateten ekipa CARE orgullu tebes atu komete ba ohin loron no haforsa tan CARE nia esforsu atu kontribui no realiza Prezidente nia prioridade sira.
“Ami hein atu haluan ita nia servisu hamutuk atu hadi’ak estatutu feto no labarik feto nian iha edukasaun, saude no ekonomia iha area hirak ne’ebé remota liu iha rai-laran,” nia afirma.
Tanba ne’e, iha Timor-Leste, CARE koñesidu ho ninia suporta ba setor edukasaun, partikularmente atu hadi’ak literasia, numerasia no kualidade hanorin, no hadi’ak nutrisaun liu husi promove pratika dieta saudavel ba kanorin eskola primaria sira, liuhusi programa sira hanesan Lafaek Learning Media no programa Edukasaun no Nutrisaun Hatutan. Feto nia empoderamentu ekonomia sai sentru ba CARE nia programa sira, no ida ne’e atinje liu husi responde ba imbalansu podér iha uma-laran no komunidade nia let, haforsa asesu ba formasaun hadi’ak abilidade teknika, no dezenvolve koneksaun di’ak ba merkadu.
Ho ida ne’e, parseria ida ne’e sei validu ba tinan rua no sei ajuda haluan tan inisiativa dezenvolvimentu sira ne’ebé eziste ona no hirak ne’ebé iha futuru iha area rurais no remotas iha rai-laran. Ida ne’e inklui atividade espesifiku, pratikal no komplementariu, hanesan promosaun atu enkoraja lee iha uma, promosaun tein hahan nutritivu, no suporta feto sira nia lideransa no foti-desizaun iha nivel suku.
