Reportajen Silvino Freitas
Centro Nasional Chega! (CNC) konsidera Comisaun Nacional Eleisaun (CNE) tenke iha lei ne’ebé forte hodi hakbiit observadór sira nune’e bele hapara kampaña ne’ebé ho violentu, hodi kontribui ba paz no rekonsiliasaun durante periodu eleisaun.
Membru Konsellu Administrasaun CNC Pe. Juvito do Rego hateten, CNE nia lei la forsa tanba la konsege hapara kampaña ne’ebé ho violentu no CNE mak iha direitu atu hapara tanba sira bolu hodi hala’o ona paktu laiha violénsia maibé nafatin akontese.
“CNE nia membru sira ne’e barak ba iha ne’ebá hatais farda ho observador pasivu, tenke ba ho lei ne’ebé garante ba membru CNE sira hapara kampaña ne’ebé ho violénsia ho liafuan no fizika” dehan Pe. Juvito liuhusi konferénsia imprensa iha CNC Balide, (10/05).
Nia dehan, nia husu ba governu no parlamentu atu kria lei ne’ebé bele hakbiit CNE nia membru iha kampu liuliu iha kampaña nia laran, nune’e sira iha kbiit hodi hapara kampaña ne’ebé violentu, CNE hala’o de’it observasaun haree no hein de’it remata mak foin halo karta ba partido polítika sira maibé kontinua akontese violénsia liafuan ofensiva.
“CNE presiza hapara kampaña ne’ebé violentu, lei mak tenke garante ida ne’e ba CNE” nia dehan.
Nia konklui katak, karik polítika no militante sira ne’ebé ho liberdade maka laiha limitasaun ne’e labele, hotu hotu tenke kria ambiente ne’ebé paz no rekonsiliasaun tenke hahú ho meiu públiku sira ne’e maibé uza fali meiu públiku sira ne’e hodi trata malu, presiza kontrola husi CNE tanba CNE mak delega oráriu, tempu no oportunidade ba partido polítika sira, nune’e sira iha direitu atu hapara ba partido polítika ne’ebé viola paktu sira hala’o ona iha CNE.