Reportajen Umbelina dos Reis
Bee Timor-Leste, Empreza Públika (BTL, E.P), realiza serimónia asina kontratu ho kompañia implementador HAKSOLOK (HJM), Unipesoal Lda, ne’ebé sei implementa projetu konstrusaun sistema fornesimentu bee-moos iha Postu Administrativu Fatuberliu, Munisípiu Manufahi, no sei kobre iha suku 3, Suku Klakuk, Fatukahi, no Kaikasa, no sei monta metru kontador unidade 759 ba kada uma-kain ho total populasaun 4554. Orsamentu ne’ebé prevé ba projetu ne’e $666,591.79.
Diretor Kompaña HAKSOLOK (HJM), Elder Viera Aniceto agradese tanba bele hetan fiar hosi VIII Governu liu hosi BTL, hodi fó konfiansa ba projetu konstrusaun sistema fornesimentu bee-moos ne’e.
“Konfiansa ne’ebé governu fó ba kompañia HAKSOLOK, sei fó obra ne’ebé kualidade di’ak no hakerek ona iha kontratu katak tenki tuir durasaun ne’ebé mak BTL fó. Nu’udar Timor-oan agradese tebes ba konfiansa ida ne’e tanba obra ne’e realiza no determina tuir durasaun ne’ebé mak BTL, E.P fó sai, nune’e mós kompañia HAKSOLOK la’os foin primeira vez kaer projetu ne’e, maibé kompañia HAKSOLOK halo obra ba bee-moos iha fatin barak ona, tantu iha munisípiu no inklui Kapital Dili.” Dehan diretór kompaña HAKSOLOK Elder Viera iha salaun BTL Kaikoli, 11/05.
Prezidente Bee Timor Leste, Carlos Peloi dos Reis hatete, ohin selebra asina kontratu ho Kompañia HAKSOLOK hodi bele ajuda halo servisu fornesimentu bee-moos iha kapital Postu Administrativu Fatuberlihu nian.
“Projetu ida ne’e sei iha benefísiu ba populasaun suku tolu, maibé la’os ne’e de’it, sei iha fornese bee ba fatin públiku sira hanesan, Sentru Saúde, Igreja, eskola nomos administrasaun ni-nian. Ohin ita selebra kontratu ida ne’e iha tempu badak ita nia parseiru sira liu-liu iha kompañia bele mobiliza ona sira nia rekursu, sasan para bele halo servisu iha tempu badak,” dehan Prezidente BTL ba jornalista sira iha salaun BTL, Kaikoli, Kiinta-Feira, 11/05.
Nia hatutan, kona-ba kanalizasaun ba Postu Fatuberlihu ne’e orsamentu total kuaze $1.5 milloens, kompostu hosi projeitu tolu, maibé projetu ida ohin kuaze $666, 591.79, signifika sei iha tan projetu rua hodi selebra ho kompañia rua hodi bele ajuda halo servisu.
“Ko’alia kona-ba ohin ne’e ita sei halo instalasaun bomba halo kanu transmisaun kuaze 11 kilometrus ital, iha área sira ne’ebé sira liu dala ruma iha fatin ida rua ne’e, sei korta mota no sei halo poste ki’ik sira para lori bee ba tangki rezervatóriu, ” Nia dehan.
Nia konklui, hosi 48 Postu ne’e sira promove ona 32 kapital, hela de’it postu 16, nia espera iha tempu badak sira bele remata dezeñu detalladu ho BoQ para bele promove ba futuru.
Entretantu xefe suku Fatukahi, Moises da Costa Pinto hatete, agradese ba VIII governu liu hosi Bee Timor-Leste BTL assina ona kontratu ho kompaña HAKSOLOK hodi hadi’a bee-mos ba komunidade sira iha suku tolu iha Postu Fatuberlihu. “Komunidade sira iha área remotas iha ami nia suku susar tebes atu hetan bee-mos, barak liu komunidade sira asesu bee posu maibé ho distánsia dook hosi hela fatin, tamba ne’e ami fiar katak liu iha tempu badak kompaña HAKSOLOK sei dada bee-moos ba komunidade sira iha área remotas nune’e bele hakmaan sira nia nia halerik ba bee-mos durante tempu naruk nia laran.” líder Suku ne’e hato’o.