Reportajen Umbelina dos Reis
Komisaun Nasional Eleisaun (CNE) apela ba partidu polítika sira hotu katak, kampaña eleitoral remata ohin (18/05), nune’e husu partidu polítiku sira ida-idak responsásvel hodi hasai hotu atributu partidu sira ne’ebé besik sentru votasaun iha loron rua nia laran antes 21, no atributu ne’ebé dook hosi sentru votasaun tenki hasai hotu dentru de semana ida nia laran.
“Apela ba polísia no CNE katak hela de’it loron rua atributu ne’ebé besik sentru votasaun tenki hasai hotu, no atributu ne’ebé dook hosi sentru votasaun nafatin tau atensaun, depois de semana ida tenki hasai hotu, se la hasai atributu sira ne’e CNE organiza seguransa no polísia hodi hasai atributu sira ne’e, maibé sira nia osan ba subsidiu tenki ko’a tuir duni,” apela Prezidente CNE, José Belo ba partidu polítika sira iha debate entre Partidu Polítiku sira iha Salaun Mahoka, Hudi-Laran, Dili, 18/05.
Prezidente CNE espera katak partidu polítiku sira hatene tau atributu, hola medidas tenki hasai duni, tanba sidade Dili furak ba Timor-oan.
Prezidente CNE apela mos ba líder polítiku sira katak, ohin (18/05) tipu kampaña hotu-hotu para ona, hahú aban tama ona ba loron silénsio durante loron rua, hafoin votasaun nian.