Reportajen Joselina dos Santos
Partidu Kongresu Nasionál Rekonstrusaun Timorense (CNRT) hamutuk ho estrutura tomak hato’o parabens ba povu Timor-Leste husi Tutuala to’o Oé-Cusse, Loro-as’e to’o Loro-monu, tasi-feto no tasi-mane, ne’ebe fó konfiansa ba CNRT ho votus 288,101 no persentajen 41,62 ka kadeira parlamentár 31.
Liuhosi Konferensia Imprensa, Prezidente CNRT Kay Rala Xanana Gusmão hateten, partidu CNRT mak sai vensidor iha eleisaun parlamentár 2023, maibé sei hein rezultadu finál hosi STAE-CNE no ikus liu hosi Tribunál Rekursu. Tanba rezultadu provizóriu hosi CNRT rasik liga ho rezultadu finál provizóriu hosi STAE hatudu iha eleisaun ne’e povu fó konfiansa bá partidu CNRT ho votu 288,101 no persentajen 41,62 ka kadeira parlamentár 31.
“CNRT mak manan iha eleisaun parlamentár ne’ebé hala’o iha loron 21 fulan Maiu 2023. Maibé sei hein rezultadu finál hosi STAE-CNE no ikus hosi Tribunál Rekursu. Tanba Ami iha mekanizmu rasik hodi halo kontajen votu hosi fiskál partidu CNRT nian iha sentru votasaun. Ami mos iha akta husi sentru votasaun iha suku, postu-administrativu to’o munisípiu sira”, dehan, Prezidente CNRT Kay Rala Xanana Gusmão liuhosi Konferensia Imprensa iha Sede CNRT Bairro do Grilhos, tersa 23/05.
Partidu CNRT hein de’it rezultadu husi STAE hafoin CNRT konpara no hanesan karik la hanesan ami sei husu malu tanba sá la hanesan. Nune’e Nia kompara ho espetativa iha jogu futebol bainhira klube ida hakarak joga iha nia epetativa atu manan 3-0, maibé rezultadu hatudu katak manan 2-0, ne’e mak realidade. Tanba Manan mais ida-ne’e mak realidade Kontente mas la kontente, nune’e hein de’it rezultadu final ne’ebé sei fó sai hosi Tribunal Rekursu.