Reportajen David da Costa
Prezidente Repúblika (PR) José Ramos-Horta, ohin fó kondekorasaun aas liu Estadu Timor-Leste nian, Grand Collar of the Order of Timor-Leste, ba eis Prezidente da-5 Repúblika Indonézia, Megawati Soekarnoputri.
Iha nia diskursu Prezidente Ramos-Horta hateten, kondekorasaun ne’e reprezenta rekuiñesimentu ba lideransa polítika Megawati no nia kontribuisaun boot ba konsolidasaun demokrasia iha Indonézia, nomós ba dezenvolvimentu relasaun amizade no koperasaun entre Timor-Leste no Indonézia.
“Grand Collar of the Order of Timor-Leste ne’ebé ami fó ba Ita boot ohin simboliza rekuiñesimentu, Tanba Ita boot nia kontribuisaun boot ba konsolidasaun demokrasia Indonézia no ba konstrusaun amizade ne’ebé permanente entre Timor-Leste no Indonézia,” dehan Prezidente Ramos-Horta, bainhira halo nia diskursu iha salaun china Palásiu Prezidensiál Bairo-Pite, Kinta 9/07.
Nia hakturi, Megawati sai figura importante ida iha movimentu Reformasi Indonézia, liu-liu durante períodu tranzisaun demokrátika iha finál tinan 1990 sira. No Megawati hili dalan demokrátiku, respeita prosesu konstitusionál no promove estabilidade polítika iha momentu ida ne’ebé Indonézia hasoru krize polítika, ekonómika no sosiál.
Tanba ne’e, desizaun istóriku Governu Indonézia iha tempu Prezidente B. J. Habibie atu realiza Konsulta Populár Timor-Leste iha 30 Agostu 1999. Bainhira Megawati sai Prezidente iha 2001, nia simu realidade foun Timor-Leste nu’udar Estadu independente, koopera ho Nasoins Unidas no promove normalizasaun relasaun diplomátika entre nasaun rua ne’e.
Nia subliña, amizade ne’ebé iha ohin entre Timor-Leste no Indonézia la’ós rezultadu husi haluha pasadu, maibé rezultadu husi korajen polítiku, rekonsiliasaun no kompromisu husi lider sira atu transforma konflitu ba kperasaun. Nia mos rekuiñese papel importante husi PM Xanana Gusmão no lider Indonéziu sira iha konstrusaun relasaun bilateral ne’ebé metin.
Prezidente Ramos-Horta afirma, Grand Collar of the Order of Timor-Leste simboliza omenajen ba korajen polítiku, lideransa sábiu, espírito rekonsiliasaun no vizaun ba futuru ne’ebé Megawati hatudu durante nia moris polítika. Tanba ne’e, jerasaun foun Timor-Leste no Indonézia sei kontinua hametin amizade, respeitu malu no koperasaun ba benefísiu povu rua.
Nune’e mos, antiga Prezidente da-5 Repúblika Indonézia, Megawati Soekarnoputri, dehan, kondekorasaun Grand Collar of the Order of Timor-Leste ne’ebé nia simu husi Prezidente Repúblika, José Ramos-Horta, la’ós remate husi istória ida, maibé hahú foun ida atu kontinua hametin amizade no kooperasaun entre Timor-Leste no Indonézia.
Iha nia diskursu iha serimónia kondekorasaun, Megawati hateten katak onra ne’e reprezenta mandatu ba futuru no promesa ida atu nasaun rua kontinua servisu hamutuk ba jerasaun sira tuirmai.
“Ha’u la simu onra ida ne’e hanesan remata husi istória ida. Ha’u simu ida ne’e hanesan hahú foun ida. Ne’e mak mandatu ida ba futuru no promesa ida kona-ba buat sira ne’ebé seidauk ita halo,” dehan Megawati.
Nia esplika Grand Collar ida ne’e ba nia hanesan korente ida ne’ebé liga malu, simboliza relasaun amizade ne’ebé tenke kontinua husi jerasaun ida ba jerasaun seluk no la bele kotu.
Tanba onra ne’e la’ós ba nia de’it, maibé pertense ba joven no labarik sira iha Timor-Leste no Indonézia, inklui mós jerasaun sira ne’ebé seidauk moris. Nia bolu atu jerasaun foun sira kontinua rai metin amizade no parseria entre nasaun rua.
Nia mós rekorda istória luta independénsia nasaun rua, hodi hateten katak povu Indonézia no Timor-Leste hotu-hotu liu ona husi tempu difísil atu alkansa liberdade. Tanba ne’e, nia konsidera amizade entre nasaun rua nu’udar patrimóniu ida ne’ebé presiza proteje no hametin.
Megawati hato’o nia konviksaun katak jerasaun joven sira sei kontinua hametin amizade ne’ebé iha entre nasaun rua, hodi halo relasaun ne’e forte liu, metin liu no naruk liu iha futuru.
