Reportajen Silvino Freitas
Primeiru Ministru VIII governu konstituisionál Taur Matan Ruak hato’o parabens ba partido hotu, ne’ebé partisipa iha eleisaun parlamentár no espesiálmente ba partido Congreso Nacional Reconstrução de Timor (CNRT) ne’ebé sai vensedór ba eleisaun parlamentar 2023-2028, nune’e nia agradese mós parte hotu nia kontribuisaun ba festa demokrasia ne’ebé la’o di’ak tebes.
Taur Matan Ruak hateten, nia informa ona Prezidente Republika, Dr. Jose Ramos Horta kona-ba tranzisaun no sira mós preparadu tebes nune’e iha ultimu enkontru Konsellu Ministru nian ne’ebé sei hala’o iha loron 7 Junu nian, iha loron ne’ebé tribunál rekursu fo sai rezultadu eleisaun no publika iha Jornál Republika, nune’e iha loron tuir mai hein de’it ba loron tomada de posse sira sei mai hodi entrega tranzisaun governu nian.
“Ha’u hakarak hatoo parabéns ba partidu sira hotu ne’ebé partisipa iha eleisaun no espesial ba partido vensedór CNRT” dehan TMR hafoin enkontru ho PR Horta, (24/05).
Nia dehan, gradese mós ba sidadaun sira nia kontribuisaun, maski iha problema kiikoan barak maibé kompara ho eleisaun sira seluk, maibé neineik ita sei hadi’a no ida ne’e kredibiliza, foti ita nia prestijiu hanesan país ne’ebé valoriza sistema demokrátiku estadu de direitu nian, hato’o mós nia agradesimentu ba observadór sira PNTL sira ne’ebé hola’o servisu brilante tebes no elojía mós komadante PNTL no FFDTL funsionáriu sira STAE no CNE nian, fiskais nomós jornalista sira ne’ebé hala’o kobertura kontribuisaun direta no indiretamente ba festa demokrasia nune’e bele la’o di’ak.
“Simu buat ne’ebé povu fó la’os buat ne’ebé ita hakarak, ita hakarak ne’e buat seluk ida, ha’u hakarak kadeira ualu mantein ka kadeira ruanulu, mais ne’e la’os buat ne’ebé povu hakarak entaun ita simu buat ne’ebé sira hakarak” nia konklui.