Reportajen Silvinoa Freitas
Movimento Juventude Munisípiu Aileu (MJMA) lamenta ho kompañia RELEQ.Lda ne’ebé hala’o intervensaun ba projetu infraestrutura bazika iha munisípiu Aileu, nune’e sira hamutuk ho juventude no aileba husi Aileu oan sei hala’o asaun pasifika hasoru kompaña.
Portavoz Simão Neto Soares hateten, kompaña lokál RELEQ, LDA ne’ebé hala’o impedimentu ba konstrusaun estrada diresaun Aileu-villa ba Liquidoe inklui ba Remixio ba to’o Simpan Tiga Beluru, nune’e Aileu oan ne’ebé hamaan an iha MJMA nomós estudante, aileba oan sira ne’ebé buka moris iha kapitál Dili ejiji ba ministeriu obras públika atu fo ordem ba kompaña internasionál COVEC atu hala’o ona lansamentu ba primeira pedra ba estrada refere.
“Husu ba kompaña RELEQ, LDA atu retira hikas karta ne’ebé hato’o ona ba iha ministeriu obras públika iha loron 16 fulan fevereiru tinan 2023” dehan portavoz Simão Neto Soares liuhusi komunikadu imprensa iha jardín 5 de maio Dili, (10/06).
Portavoz ne’e mós husu ba obras públika munisípiu Aileu atu toma responsabilidade ba projetu refere, karik projeitu ne’e maka la realiza sira sei hamutuk ho estudante no aileba husi Aileu oan sira ne’ebé buka moris iha munisípiu Dili, hamutuk ho autoridade postu Aileu-villa, Liquidoe no Remixiu mobiliza massa hala’o asaun pasífika hasoru kompaña ne’ebé hala’o impedimentu ba konstrusaun refere.
“Haree mós katak postu Liquidoe ne’e potensiál ba produtu lokál sira hanesan sabraka no seluk tan, iha mós rekursu natural ba pontu turistiku nian hanesan bee-manas ne’ebé bele atrai vizitante sira ba fatin refere, nune’e husi kontrusaun estrada ne’e sei fasilita tebes komunidade ne’ebé asesu ba estrada refere” dehan portavoz Simão.
Nia dehan tan, Aileu oan sira ne’ebé espesifikamente pertense ba postu 3 ne’ebé afeta ba intervensaun individual balun ba infrastructura-baziku iha munisípiu Aileu, nu’udar estudante no juventude prontu soke ba kualker se de’it mak la kontribui ba dezenvolvimento munisípiu nian ne’ebé durante ne’e povu Liquidoe, Remexio no Aileu-villa halerik ba estrada nomós iha tempu udan halerik no hakilar ba estrada maibé iha oportunidade ne’e tanba atu lansa de’it ona no sei fo vantajen boot ba ekonomia komunidade sira iha Aileu.
“Infelizmente kompaña ne’e hala’o intervensaun ba dala rua ona, antes ne’e sira hala’o uluk ona intervensaun ba eletrisidade ne’ebé atu dada ba suku Fatirilau suku izoladu tebes iha postu Liquidoe nian, tanba kompaña nia interese laho interese povu Liquidoe nian, ikus mai sira nafatin interven ba dezenvolvimento hotu maka povu hein durante tinan 22” konklui Portavoz Simão.
