Reportajen David da Costa
Provedór Direitus Umanus no Justisa (PDHJ), Virgilio da Silva Guetrres preokupa ho Defensór Públiku (DP) iha Timor-Leste, tanba sira iha anónimu boot liu, defende de’it ba sira nia kliente ne’ebé maka iha osan boot, ema Pengusaha no eis politika, maibé ba kliente sira ne’ebé maka kiak, Defensór Publiku sira sei la preokupa no la haree.
Provedór Virgilio “Lamukan” hateten, bainhira PDHJ ba prizaun Suai, no husu prizioneiru sira iha ne’ebá, sira hateten katak laiha vizita regular husi Defensór Publiku atu mai kunsulta sira, kona-ba sira nia fase preventiva ninian, dalaruma prizioneiru sira desizaun balun ba sira la justu, sira hakarak halo rekursu, maibé laiha ema ida sira atu konsulta, saida maka sira simu iha primeiru instansia ninia, ida ne’e dados balun ne’ebé maka providór hetan liuhusi Monitorizasaun ne’ebé-ke durante ne’e la’o.
“Asistensia legal husi Defensór publika, buat ne’ebé Providór nota katak ita nia Defensór Publiku sira iha anonimu boot liu kuandu sira nia kliente sira ema osan nain, kuandu ema ka, ema Pengusaha, eis politiku buat ruma, ne’e sira nia intervensaun la’os depende de’it iha Tribunal, iha televizaun mós sira ko’alia boot loos, maibé ema kiik sira, no kiak sira ita ladun haree,” dehan Virgilio bainhira partisipa iha lansamentu relatoriu Panorma Prizaun no Video Panorma Kondisaun Direitu Prizioneirus, iha Edifísiu HAK Farol, Sexta 9/06.
Alende ne’e mós, Provedór hateten, iha asuntu ne’ebé maka sai preokupasaun maka, “Ita nia oan sira ne’ebé maka involve iha krime, sei hamutuk hela ho prizioneru boot sira. Labarik sira kuandu hamutuk ho adultu sira, sira sai vulniravel liu ba violasaun oin-oin, inklui avuzu sexual,pedofila ne’e sempre mosu ba labarik sira iha prizaun laran”.
Maibé PDHJ haksolok, tanba Ministru Justisa iha ona planu hodi halo kooperasaun bilateral ho governu Japaun, atu estabelese ka hari’i sentru reabilitasaun ba Juvenil sira. Ho ida ne’e PDHJ iha esperansa ba Governu foun kontinua ho projetu sira ne’e, hodi kria kondisaun ba prizioneiru Juveníl sira.
Entretantu Defensór Públiku Jerál (DPJ), Cancio Xavier, hatan ba preokupasaun PDHJ nian, ida ne’e maka sai dezafiu ba Defensór Publiku sira, no kondisoens hotu sei resolve bainhira Defensór Publiku iha orsamentu, tanba problema mak rekursu umanu menus
Nia hatutan, iha Defensór Publiku opta atu defende ba ema sira ne’ebé maka laiha kbiit, maibé realidade Defensór Publiku nia partisipasaun hodi fó asistensia ne’e naton ona, no la haree ba iha ema riku no kiak. Maibé Defensór Publiku mós sei menus iha rekursu umanu, tanba dadaun ne’e Defensór Publiku iha nain 34 de’it.
