Home Notisia Ema ho Difisiensia Kuaze 5% Deit Mak Asesu Serbisu no 60% Analfabetu

Ema ho Difisiensia Kuaze 5% Deit Mak Asesu Serbisu no 60% Analfabetu

334
0
Diretor Ezekutivu ADTL, Cesario da Silva. [Foto: Santina Lucia da Costa | 11.09.2020]

Reportazen Santina Lucia da Costa

“Dezafiu boot ida maka pensamentu negativu ba Ema ho Difisiensia, liga liu ba atetude ema sira ne’ebe fo serbisu ba ema ho difisiensia ne’e hanoin uluk, katak EhD bele halo saida, situasaun ida ne’e mak impede maka’as partisipasaun EhD nian, nune’e rezulta eskluzaun, rezulta EhD esklui sira nia-an no rezulta EhD, sira labele hola parte iha setor liu-liu iha merkadu de trabalho”. Diretor ezekutivu ADTL

Kooperasaun Alemanha liu husi  Gesellschaft für Internationale Zusammenarbeit (GIZ) iha Timor-Leste kolabora ho Asosiasaun Difisiensia Timor-Leste  (ADTL) organiza seminariu loron ida kona-ba empregu no oportunidade hasae rendimentu ba ema ho difisiensia, oportunidade no dezafius sira ba joven ho difisienia iha Timor-Leste, ne’ebe hala’o iha Maubara Room, Timor-Plaza, Dili. Loron, 11/09.

Ba Jornalista sira Diretor Ezekutivu ADTL, Cesario da Silva hateten seminariu ne’e koalia foku liu ba empregu ho hasae rendimentu Ema ho Difisiensia (EhD), liuliu haree ba setor ekonomia nian, entaun seminiariu ne’e, oportunidade espasu dahuluk ne’ebe ita organiza, atu bolu hamutuk entidades hotu-hotu, liuliu haree koalia kona-ba empregu no empregabilidade, atu haree oportunidade sira ba EhD, hodi asesu ba centru formasaun sira, serbisu, asesu ba emporadementu ekonomia ema ho difisiensia nian.

“Oportunidade ida ne’e, bolu hamutuk Ema ho Difisiensia hodi haree hamutuk, dezafiu no oportunidade sira ne’ebe EhD iha, alende ida ne’e, iha mos Ministeriu relevante sira, setor privadu sira atu mai haree, kona-ba ema ho difisiensia iha setor empregu nian, oinsa asegura partisipasaun EhD nian iha setor ekonomia, liuliu hadia moris ekonomia familia nian”, hateten Diretor Ezekutivu ADTL.

Diretor Ezekutivu ADTL informa numeru Ema ho Difisiensia (EhD) asesu ba kampu de trabalho, numeru ki’ik liu, dadus la serteza kuaze 5% mak EhD asesu serbisu no numeru 60% mak analfabetu, la asesu edukasaun no barak mak para eskola

Cesario da Silva dehan dezafiu boot ida maka pensamentu negativu ba Ema ho Difisiensia, liga liu ba atetude ema sira ne’ebe fo serbisu ba ema ho difisiensia ne’e hanoin uluk, katak EhD bele halo saida, situasaun ida ne’e mak impede maka’as partisipasaun EhD nian, nune’e rezulta eskluzaun, rezulta EhD esklui sira nia-an no rezulta EhD, sira labele hola parte iha setor liu-liu iha merkadu de trabalho.

Iha fatin hanesan, Sekretaria Estadu ba Igualdade no Inkluzaun (SEII), Maria Jose da Foseca Monteiro de Jesus hateten SEII iha papel hodi halo advokasia ba direitu ema ho difisiensia nian, tanba aporta fali SEII nian ba igualdade no inkluzaun nian. SEII sempre halo advokasia no asegura inkluzaun bai ha komponente hotu-hotu iha ita nia sosiedade.

”Hau hanoin laos instituisaun governu mak halo diskriminasaun, maibe ita ida-idak serbisu instituisaun governu maka halo diskriminasaun ba ita nia maluk sira no familia laran rasik”, hateten, SEII, Maria Jose da Fonseca.

SEII afirma ita nia lei inan oioin, ita iha politika governu no lei atu asegura inkluzaun maibe ita mai ho hanoin ida katak, ema ho difisiensia ne’e, ema inferior ba ita  sosiedade ida ne’e, mak ita kontinua halo diskriminasaun.

“Serbisu boot ida laos de’it governu maibe ita hotu, liuliu maluk sira husi media ninian, tenki asegura ita boot sira mos halo edukasaun ba ita nia publiku, ba ita nia sosiedade katak maluk portadora difisiensia ne’e, laos sidadaun numeru rua iha ita nia sosiedade, sira hanesan komponente importante ida, sira hanesan mos timoroan, sira iha direitu no dever hanesan ho maluk sira laos portadora difisiensia”, hateten, Maria Jose Fonseca.

Kooperasaun Alemanha mos apoiu ona ADTL, hodi fo treinamentu jestaun kompetensia kareira no provizaun sira, hodi kria oportunidade ba EhD sira, hodi asesu ba programa treinamentu no empregu inklui fo apoiu kiik, hodi hahu atividade negosiu husi ema ho defisienia sira.

Print Friendly, PDF & Email

LEAVE A REPLY

Please enter your comment!
Please enter your name here