Home Notisia OXFAM: Feto Partisipa Makaas Iha Produsaun Agrikultura, Maibe Susar Asesu Merkadu

OXFAM: Feto Partisipa Makaas Iha Produsaun Agrikultura, Maibe Susar Asesu Merkadu

550
0
Jerente Programa OXFAM Timor-Leste, Fernando da Costa. [Foto: Santina Lucia da Costa | 11.03.2020]

Reportazen Santina Lucia da Costa

Relasiona selebra loron feto mundial, Rede Feto ho OXFAM Timor-Leste organiza workshop ho tema “Agrikultura Subsistensia no Ekonomia Sustentavel”

Prezidente Rede Feto, Judith Dias Ximenes ba Neon Metin hateten, Seminariu ne’e realiza atu komemora loron feto mundial. Feto maluk Timor maioria hela iha area rurais ho sira nia problema ne’ebe kompleksu tebes.

“Tinan 2020 halo oinsa mak feto sira rasik identifika sira nia problema agrikultura, no sira nia problema produsaun sira seluk hanesan industria sira, depois ita atu hakbiit sira. Planu ami sei reforsa grupu ne’e, lori sira nia aspirasaun to’o leten no fila-fali mai reforsa sira”, hateten Prezidente Rede Feto, Judite Dias Ximenes iha salaun Administrativu Liquica, 11/03.

Judith hatutan liu hosi workshop ne’e atu hare mos feto produtores sira hatene sira nia kondisaun ekonomika lolos, no buka dalan atu sai husi problema ne’ebé mak sira infrenta. Feto rural sira tenke hatene katak feto mak jerasaun igualdade, feto mak jerasaun ba ida ne’e duni, hahu husi hau aan rasik, laos husi ema seluk, hau mak serbisu iha toos, ku’u kafé no bele halo hatais.

Iha fatin hanesan, Jerente Programa OXFAM Timor-Leste, Fernando da Costa hateten, OXFAM rasik hakarak apoiu selebrasaun loron feto mundial nian tanba hanoin katak importante tebes atu kontinua fó mensajen konaba feto nia partisipasaun.

“Ami nia peskiza agrikultura foin lalais ne’e, peskiza iha fatin 3, Ermera-Railako, Viqueque, no Oecusse,  hatudu katak problema boot liu komunidade identifika mak liuliu ba asesu merkadu, asesu ba merkadu ne’e laos koala de’it ba estrada, estrada ne’e dalan boot, maibé dalan sira ki’ik oan ne’ebé maka ema uza lori produtu ida ne’e, mak dalaruma sai difikuldade”, hateten Jerente Programa OXFAM Timor-Leste, Fernando da Costa.

Fernando da Costa hatutan importante husi peskiza ida ne’e, hatudu katak feto mak hasoru dezafius boot liu, dezafius primeiru tanba sira feto, sira ladun iha kontrola ba desizaun ba gastus, bainhira hetan rendimentu husi agrikultura.

“Sira partisipa maka’as ba halo produsaun, mais kuandu fa’an, atu desidi fa’an  hira, lori ba merkadu ne’e sira la tama ona ba desizaun, relasaun ho rai, tanba sira laiha direitu ba rai, entaun sira la determina saida mak sira kontribui”,  tenik Fernando da Costa.

Nune’e mós Reprezentante Autóridade Munisipiu Liquica, agradese ba Rede Feto Timor-Leste, tanba bele organiza seminariu ida ne’e, liuliu atu haree ba asistensia agrikultura, ekonomia no sustentavel nian, hanoin katak topiku ne’ebé importante tebes, oinsa enkoraja feto sira iha area rurais hasa’e sira nia koñesimentu fó kapasidade ba sira, fó oportunidade ba sira, hodi bele dezenvolve sira nia-an, grupu, familia, hodi nune’e bele haree sira familia ba futuru.

Print Friendly, PDF & Email

LEAVE A REPLY

Please enter your comment!
Please enter your name here