Home Justisa Soe Bebe Ne’e Viola Direitu Umanu, Maria: Presiza Serbisu Hamutuk Hodi Proteje...

Soe Bebe Ne’e Viola Direitu Umanu, Maria: Presiza Serbisu Hamutuk Hodi Proteje no Prevene

381
0
Seminariu konaba kazu soe bebe iha salaun CNE. [Foto: Santina Lucia da Costa | 12.03.2020]

Reportazen Santina Lucia da Costa

Kazu soe bebe ne’ebe sei akontese bebeik no sai diskusaun iha sosia media. Liu hosi selebrasaun loron feto mundial ne’ebe monu iha loron 8 Marsu, Fundasaun Alola realiza seminariu konaba kestaun soe bebe no konaba autor sira hanesan feto ho mane, ne’ebe halao asaun kontra direitus umanus

Chefe Ezekutiva Fundasaun Alola, Maria Imaculada Guterres hateten iha intervensaun hateten hahalok krimi soe bebe, presiza prevene lalais tanba Timor-Leste iha Lei hodi proteje no asegura.

 “Krime soe bebe iha komunidade no ita nia sosiedade, krime ida ne’e ita presiza prevene lalais, ita mós iha Lei ne’ebé atu proteje no asegura, nune’e husu ba autóridade lokal sira, hanesan Xefe Suku, komunidade, PNTL no sosiedade sivil, serbisu hamutuk atu proteje, prevene no asegura, nune’e mós liu husi inan-aman fó motivasaun di’ak ba labrik feto sira, hahu husi uma laran, atu nune’e ba futuru labele akontese tan”,  hateten Diretora Fundasaun Alola, Maria Guterres iha salaun CNE, 12/03.

Xefe Ezekutiva Maria hatutan labarik sira mak futuru nasaun nian, se ita la prevene oinsa futuru nasaun ida ne’e, bele hetan kualidade ema iha komunidade sira.

Maria Guterres fo hanoin katak  loron  feto mundial hanesan loron importante ba feto iha mundu tomak, hodi asegura sira nia partisipasaun iha setóres hotu, laos haree de’it kuantidade partisipasaun feto, maibé tenke mós asegura kualidade feto hodi bele haforsa influensia ba foti desizaun iha nivel hotu.

Iha fatin hanesan, Reprezentante Rede Feto Timor-Leste, hateten importante tebes atu bele lori hamutuk problema ida ne’e iha ita nia rai laran, sempre hetan soe bebe no tinan ida ne’e kontinua hetan, presiza serbisu hamutuk, hodi hatan ba problema ida ne’e.

Atu asegura igualdade jeneru ida ne’e, prevene atu labele akontese tan iha ita nia rai, presiza tebes koalia ho labarik feto-mane, konaba saida mak igualdade jeneru ne’e rasik, no presija hasa’e sira nia konsiensia no presiza mós prevene kaben sedu. Se kaben sedu ka isin rua sedu, nia labele kontinua estudu, maske governu liu hosi Ministeriu Edukasaun kria ona politika”, hateten reprezentante Rede Feto

Objetivu hosi seminariu ne’e, nu’udar asaun prevensaun importante ida atu fó atensaun ba komunidade, liu-liu ba lideransa komunitariu sira atu uza sira nia poder, hodi kontrola nia populasaun iha suku to’o bairu-bairu, atu prevene no proteje hahalok soe bebe/infantisidiu ne’ebé viola ema nia direitu umanu.

Seminariu ne’e ho topiku “Asegura Igualdade Jeneru no Asaun Prevensaun ba KazuIinfantesidu”.

Seminariu ne’e hetan partisipasaun hosi autóridade lokal, Xefe Suku, PNTL, Sosiedade Sivil, Manorin sira, estudante husi Sekundariu ho Universidade, maluk ho defisiens sira.

Seminariu refere organiza hosi Fundasaun Alola, Fokupers, PNTL, Rede Feto, Pradet, Alfela, JSMP, Moffe, Mane ho Vizaun Foun, ne’ebé hetan apoiu finanseiru hosi Secretariadu Estadu Igualdade no Inkluzaun, Australian AID, IWDA no WAFE.

LEAVE A REPLY

Please enter your comment!
Please enter your name here