Reportazen Filomena da Conceicao
Dom Virgilio Kardeal do Carmo da Silva Arsebispo Metropolitanu Dili, hateten, saudoza Isabel da Costa Ferreira nia mate la’os lakon ida ba Primeiru Ministru Taur Matan Ruak ho Oan na’in tolu no Família de’it, maibé povu tomak iha Timor laran sente hotu lakon ida matebian saudoza Isabel da Costa Ferreira.
Dom Virgilio, hato’o sentidu kondolensia profunda ba nain Primeiru Ministru Taur Matan Ruak ho nia oan nain tolu ho família tomak ne’ebé iha ne’e laran susar lakon nianmama doben, belun di’ak ida Dona Isabel da Costa Ferreira.
“Ha’u hakarak hakarak foti hanoin ruma husi Santu balun dehan ita ema nune’e, ita nia moris mak hanesan ne’e moris ne’e temoirariu de’it jogu ida iha rai ne’e. Dona Isabel da Costa Ferreira nia mate la’os lakon ida ba família de’it maibé povu barak mós sente ida ne’e, ida ne’e mak ita haree iha loron hirak ne’e,” dehan nia hafoin Prezide misa ikus ba saudoza Isabel nia mate iha Igreja Parokia Balide, Kuarta 21/06.
Tanba ema rihun tama sai nia Rezidensia Meti-aut maske susar uitoan to’o iha neebá, maibé hakarak hakbesik ba nia kaisaun atu hameno obrigadu agradese ba moris ne’ebé nia kuda duni politika ne’ebé matebian husik hela mai ema hotu.
Esperansa ne’ebé mak baze ba Dona Isabel nia moris maske tempu la barak tinan 49, maibé nia kumpri didi’ak nia misaun to’o rohan mak mate, ne’e fó hanoin hotu-hotu la’ós moris naruk mak buka maibé moris ikus fila ba mortalidade.
“Bu’at ida ne’ebé halo ita laran susar mak ita nia fahe malu, basa hodi mate haketak ita totál husi ita nia mama doben labele tan komunika hanesan baibain aujensia kontaktu fiziku entre ema moris no ema mate ida ne’e mak halo ita lakon ita nia lian,” tenik nia.
Nia esplika, iha situasaun ida hanesan ne’e dala barak sente iha nakukun lakon maluk ida mak halo ema hotu hanoin kona-ba santa Monika no Santo Agostihno nia mama bainhira molok atu mate husik hela nia liafuan ba nia oan.
“Oan bainhira ha’u mate liu tiha loron rua imi ba hanoi tiha isin ida ne’e iha fatin ne’ebé o hanoin dignu, maibé ha’u lakohi ne’e halo todan fali o, favor boot ida ha’u husu ba o mak ida ne’e de’it, iha ne’ebé de’it mak o ba bainhira iha nain nia altar keta haluhan ha’u, Iha altar mak nia oan hasae sakrifisiu ba Maromak bu’at importante liu mak Orasaun,” nia haktuir.
Nia dehan, ema hotu-hotu hatene Dona Isabel iha devosaun boot iha eukaristia la hatene katak nia halo la’os tan obrigasaun, maibé tanba domin. Sein duvida nu’udar ema sente lakon tebes maibé tenke agradese mós ba Maromak ba moris ne’ebé Maromak fo mai hotu-hotu liu husi Dona Isabel da Costa Ferreira ba di’ak hotu.
Tuir observasaun jornalista iha funebre saudoza Isabel nia isin, hetan partisipasaun husi nai Prezidente Repúblika José Manuel Ramos Horta, Prezidente Tribunal Rekursu Deolindo dos Santos, Eis Prezidente Repúblika Francisco Guterres Lu Olo, Eis Primeiru Ministru Mari Alkatiri, membru Governu hotu no mós Xefe Estadu Maijor Jeneral Falur Rate Laek no entidade sira seluk. Partisipasaun masimu husi familia, kolega no komunidade sira.
Hafoin la’o tuir rute sai husi rezidensia Metiaut oras tuku 2 mai Igreja Balide, observa katak iha dalan ninin sira estudante, komunidade, joven hamrik hodi hasi filmajen ka video no foto ba saudoza ne’ebé ambulansia tula mai Igreja. Hafoin misa kontinua ba simiteiru Bekusse, joven sira ne’ebé haknar aan iha Sentru Quesadhip Ruak ho espanduk hamrik iha estrada hodi parte taibesi sentru Quesadhip nia oin hodi presta mós omenajen ba saudoza Isabel da Costa Ferreira