Reportajen Filomena da Conceição
Traballadores na’in 10, ne’ebé akompaña husi Sindikatu-TRABALIAN Timor nian, ohin kontinua halo asaun hasoru kompañia PALIPON ne’ebé mak foti desizaun hodi hasai sira, maibé Kompañia ne’e hatan ba traballador nia preokupasaun katak, Kompañia PALIPON sei simu fali traballadores na’in 10 ne’e, bainhira Kilenta sira visita Hotel ne’e barak fali ona
Responsável Jurídika husi kompaña PALIPON Lda, ne’ebé lakoi temi nia identidade ne’e dehan, Uluk hotel ne’e traballadores hamutuk 22 maka servisu iha Hotel ne’e, maibé momentu virus Covid-19 invade Timor-Leste, entaun turista sira mós la tama ona no kompaña laiha ona osan. Maské, osan la tama no trabalhador sira la hala’o servisu mas kompaña PALIPON mós nafatin selu traballadór 22 durante fulan 16, maibé depois de Covid-19, nain Hotel Esplanada fila mai Timor no deskobre katak Turista laiha no selu de’it traballadores durante fulan 16, tanba ne’e nia deside hapara traballdór sira husi servisu no deside hapara Hotel refere tanba kliente laiha, maibé antes kompaña refere hapara traballdór, nain ba Kompaña mós deside selu traballadores 22 ho 70%.
“Ha’u kolia deit kestaun jurídika ba problema ida ne’e, Uluk hotel ne’e la’o normal hela no turista sira tama ba mai ho livre, maibé covid-19 tama iha Timor, osan laiha Turista laiha, no ema mós labele la’o ba mai, entaun sé osan la mai kompañia hetan osan husi ne’ebé, tanba ema la tama osan mós la monu husi lalehan ho nune’e mak kompana deside hapara traballdór sira” dehan responsável Júridiku husi kompaña PALIPON Lda, ne’ebé lakoi temi naran ba Neon Metin iha Hotel Esplanada Panti Kelapa, Tersa 27/06.
Nia haktuir, hotel Esplanada foin loke fila- fali iha fulan tolu nia laran, maibé traballadór sira ejize atu tama fali servisu no kompaña simu uluk Traballador nain neen, tanba Tuirista sira la tama no osan la iha atu selu trabalhador sira, tanba ne’e, labele obriga kompaña atu hatama sira ba servisu, maské iha Timor iha liberdade maibé liberdade tenke iha limites, sé traballador sira la kontente bele ba iha tribunal tanba iha mundu hotu partaun atu manan osan la’os atu lakon osan.
“Maibé kompania sei simu traballadór sira banhira turista sira mai barak, tanba traballdores hirak ne’e iha ona esperiensia, no kompania la taka odamatan ba traballadór sira, maibé ne’e tanba funsaun ba nesesidade ho nune’e mak kompania refere labele simu hotu traballadór 22 tanba kliente la dun barak,” nia esplika.
Tuir obsevasaun jornalista iha terenu , traballadór sira kontinua halo asaun hasoru kompaña PALIPON tanba la simu desizaun ne’ebé kompañia nain foti no la tuir lei ne’ebé vigora iha Timor-Leste, tanba ne’e traballadór sira kontinua ezije sira nia direitu to’o hetan rezultadu. Aleinde ne’e jornalista koko atu entrevista ho na’in ba Kompaña Rosa Maria Alves maibé reizeita atu fó informasaun.