Reportajen David da Costa
Relasiona ho situasaun ne’ebe jornalista sira kontinua hasoru, no Asosiasaun Jornalista Timor Lorosa’e (AJTL), konsidera iha tentativa atu hamate liberdade imprensa no espresaun iha Timor-Leste, nune’e liuhusi konferénsia imprensa AJTL kontinua halo advokasia no husu ba konsellu Imprensa atu kontinua sosializa Lei Komunikasaun Sosial sira ba instituisaun sira iha rai laran.
Nu’udar resposta ba Ministériu Públiku nia notifikasaun hasoru Jornalista Hatutan.com, Rogério Pereira Carceres ho nia Xefe Redasaun, Francisco Ximoés Belo da Costa relasiona ho Hatutan.com nia publikasaun notísia kona-ba Prokuadór Jerál (PGR), Alfonso Lopes ne’ebé deskonfia uza Estadu nia osan hodi halo viajen privadu ba Lisboa – Portugal no ameasa husi eis-seminarista no superiór sira Semináriu Minor Nosa Señora de Fatima (SENOFA) nian foin dadauk ne’e relasiona ho Mídia Online Diligente nia notísia kona-ba deskonfia “maus-tratus, agresaun no fornesimentu hahan ladi’ak” ne’ebé akontese iha SENOFA , Asosiasaun Jornalista Timor Lorosa’e (AJTL) haree katak aktu hirak ne’e la reflete valór sira demokrasia nian no la reflete prinsípiu direitu demokrátiku ne’ebé Timor-Leste opta nu’udar filosofia moris país nian tamba ida-ne’e impede no hatauk jornalista no mídia atu hato’o informasaun kona-ba violasaun direitu umanu, transparénsia no kontabilidade ne’ebé parte ida husi prinsípiu boa governasaun no valór demokrasia nian.
AJTL husu ba Konsellu Imprensa atu foti inisiativa hodi halo mediasaun ba kazu desputa entre Ministériu Públiku no Hatutan.com no mós kazu desputa entre SENOFA no Mídia Online Diligente ne’ebé nia kauza mak publikasaun notisia atu rezulta ba iha win-win soluition no husu mós atu kontinua halo sosializasaun kona-ba Lei Komunikasaun Sosiál ba sidadaun no entidade hotu-hotu, liuliu liga ho direitu resposta, direitu retifikasaun no mekanizmu mediasaun liuhusi serbisu hamutuk ho asosiasaun jornalista sira.
AJTL hateten katak Membru Konsellu Imprensa sira ne’ebé mai husi asosiasaun jornalista sira, atu pro-ativu hodi foti asaun liuhusi diskusaun sira, tau hamutuk idea no buka solusaun ba problema sira ne’ebé jornalista no mídia hasoru iha kontestu kobertura no publikasaun notísia ne’ebé ameasa liberdade imprensa no liberdade espresaun iha Timor-Leste.
AJTL husu mos ba jornalista no kanál mídia hotu atu nafatin kumpri Kódigu Étika Jornaístika, Lei Komunikasaun Sosiál no prinsípiu sira jornalizmu nian bainhira hala’o knaar jornalizmu iha ne’ebé deit atu nafatin asegura no garante liberdade imprensa no liberdade espresaun iha Timor-Leste.
