Reportajen David da Costa
Relasiona ho situasaun ne’ebe jornalista no media Diligente sira hasoru, tanba nutisia ne’ebe sira hakerek konaba deskonfia “maus-tratus, agresaun no fornesimentu hahan ladi’ak” ne’ebé akontese iha SENOFA, no hamosu reasaun husi SENOFA tanba konsidera la los no akuzativu, no hamosu insultu ba pesoal sira iha media online Diligente, nune’e Asosiasaun Jornalista Timor Lorosa’e (AJTL) ba Jestór no superiór sira SENOFA nian, atu kontinua uza direitu resposta ne’ebé hatuur ona iha Lei Komunikasaun Sosiál, tanba ida ne’e dalan di’ak liu, atu fó resposta ba konteúdu notísia ne’ebé SENOFA konsidera la loos no akuzativu.
Portavos no Sekretariu Jeral AJTL, Acacio Pinto, hateten “SENOFA bele uza direitu resposta ne’ebé hatuur ona iha Lei Komunikasaun Sosiál, Artigu 34 nu’udar dalan di’ak liu atu fó resposta ba konteúdu notísia ne’ebé SENOFA konsidera la loos no akuzativu,” dehan Portavoz AJTL, Acasio Pinto, Liuhusi Konferenisa Imprensa iha Sede AJTL fatuhada, Tersa 27/06.
Nune’e mós AJTL husu ba Konsellu Imprensa, atu foti inisiativa hodi halo médiasaun ba kazu desputa entre Ministériu Públiku no Hatutan.com nomós kazu desputa entre SENOFA no Média Online Diligente ne’ebé nia kauza mak publikasaun notisia atu rezulta ba iha win-win solution no husu mós atu kontinua halo sosializasaun kona-ba Lei Komunikasaun Sosiál ba sidadaun no entidade hotu-hotu, liuliu liga ho direitu resposta, direitu retifikasaun no mekanizmu médiasaun liuhusi serbisu hamutuk ho asosiasaun jornalista sira.
No ba iha Membru Konsellu Imprensa sira ne’ebé mai husi asosiasaun jornalista sira atu pro-ativu hodi foti asaun liuhusi diskusaun sira, tau hamutuk idea no buka solusaun ba problema sira ne’ebé jornalista no média hasoru iha kontestu kobertura no publikasaun notísia ne’ebé ameasa liberdade imprensa no liberdade espresaun iha Timor-Leste.
Alende ne’e mós, AJTL husu ba Provedór Direitu Umanu i Justisa (PDHJ) atu kontinua akompaña prosesu legál ne’ebé Ministéiru Públiku foti hasoru jornalista no xefe redasaun Hatutan.com no posibilidade aktu legál ne’ebé SENOFA sei foti iha tempu sira tuir mai tamba ida-ne’e aktu ne’ebé konsidera nu’udar ameasa hasoru liberdade imprensa no liberdade espresaun iha país demokrátiku ida-ne’e no aktu hirak ne’e sei afeita index ranking liberdade imprensa TOP 10 (top ten) ne’ebé Timor-Leste dadauk ne’e atinji no mós ameasa ba iha ambitu Timor-Leste halo preparasaun atu tama iha ASEAN iha tinan ida-ne’e.
Entertantu AJTL husu ba Jornalista sira no kanál média hotu-hotu iha railaran atu fó salidariade ba malu hodi kontinua publika kazu hirak ne’e to’o hetan solusaun loloos no justu. Maibé Jornalista no kanál média hotu-hotu atu nafatin kumpri Kódigu Étika Jornaístika, Lei Komunikasaun Sosiál no prinsípiu sira jornalizmu nian bainhira hala’o knaar jornalizmu iha ne’ebé deit atu nafatin asegura no garante liberdade imprensa no liberdade espresaun iha Timor-Leste.
“Asaun ne’ebé AJTL halo ne’e la para iha ne’e deit, asaun ita sei kontinua hala maka husu ba Média hotu-hotu, Jornalista ida-idak iha nia plataforma média ne’e kontinua fó sai notisia ne’ebé komesa fó ameasa ba jornlista sira husi ne’ebé deit, kontinua aprosima ita nia instituisaun sira, ita nia parseiru sira atu kontinua respeita ita nia liberdade imprensa no espresaun,” dehan Prezidente AJTL, Zevonia Vieira
