Home Notisia Balibo Five, Pe. Estanislaus: Jornalista Sira nia Mate Ho Risku no Mate...

Balibo Five, Pe. Estanislaus: Jornalista Sira nia Mate Ho Risku no Mate Tanba Lia Los

300
0
Amo Paroku Balibo Pe. Estanislaus Kopong. [Foto: Francisco JDA | 20.10.2020]

Reportazen Marcio Morato Pinto

Hanoin ita nia maluk Jornalista sira nia mate, sai mos hanesan trigu musan ida, fó moris, fó motivasaun mai ita Jornalista sira tomak katak ne’e dalan ita nian, ho risku terus no mate tan lialos ruma” Pe. Estanislaus Kopong

Trajedia Balibo 16 Outubro 1975 sai istoria importante ida ne’ebe ema hotu labele haluha, liu-liu ba jornalista nain lima, ne’ebe konnesidu ho naran Balibo Five. Liu hosi misa requem ba jornalista nain lima no jornalista timoroan sira seluk ne’ebe mos mate tanba halo kobertura ba violasaun direitus umanus ne’ebe akontese iha tempu pasadu, Padre Estanislaus Kopong liu hosi nia homilia iha igreja Balibo hateten, mate nudar dalan ida atu hetan moris foun. Ho nune’e atu mosu moris foun maka trigu musan tenke mate lai, atu nune’e bele fó folin barak.

Padre Estanislaus haktuir katak situasaun profeta Jeremias nian nudar lamentasaun ba Nai Maromak konaba susar, terus no mate ne’ebe ema sei hasoru iha ninia moris. Ho situasaun sira ne’e hotu, ikus mai profeta Jeremias dehan diak liu hein ho nonok Nai nia Maksoin ne’ebe sei mai.

“Situasaun profeta Jeremias nian, ita mos hasoru iha ita nia moris, ikus mai hamutuk ho profeta Jeremias, ita mos bele dehan diak liu hein ho nonok, Nai nia Maksoin ne’ebe sei mai. Hau klamar lakon hakmatek, lakon ksolok hau la hare tan ona rikusoin no buat tomka ne’ebe hau simu hosi Nain. Fiar katak Maromak mesak ida deit Nia maka sei tau matan no kontrola buat hutu. Nai nia laran luak la mohu no Nia hadomi nafatin, loron ba loron hafoun hikas fali Nia laran luak” dehan Padre Pároku Santo Antonio Balibo, Estanislaus Kopong iha ninia humilia.

Padre ne’e mos dehan katak atu hetan moris ema presiza mate, hosi realidade mate halo ema bele hetan moris, hodi bele fó folin barak, ida ne’e nudar Lei Cristo nian katak sei hewai nia moris rasik atu nune’e bele hetan moris foun.

 “Trigo musan ne’ebe monu ba rai la mate karik, nia hela mesak maibe mate karik nia fó folin barak. Lei moris lao tuir mortalidade, ema ne’ebe hadomi nia moris sei lakon nia moris ne’e. Mate atu moris no hewai moris atu hetan moris, ne’e maka lei Cristo ninian” tenik Padre.

Bainhira atu remata humilia Padre selebrante fó hanoin ba sarani sira katak, hosi sasin mate jornalista nain lima nian, sai nudar motivasaun ba jornalista sira seluk atu bele iha espíritu hodi buka lialos.

“Hanoin ita nia maluk jornalista sira nia mate, sai mos hanesan trigu musan ida, fó moris, fó motivasaun mai ita jornalista sira tomak, katak ne’e dalan ita nian, ho risku terus no mate tan lialos ruma. Buat isin nian tenke mate, atu hamosu espíritu nian”, tenik Amo

Iha fatin hanesan, Presidente Apostuladu Orasaun nian hosi Paroquia St. Antonio Balibo, Maria José dos Santos hatoo nia sentimentu orgulhu ho seremonia Eukaristia ne’ebe selebra iha Paroquia Balibo, tamba bele fó hondra ba jornalista nain lima nia sacrificio, ne’ebe halo ona ba rai ida ne’e.

“Hanesan sarani ida hau orgulhu teb-tebes, tamba ita hanoin fila fali ba sira nain lima ne’ebe mate. Humilia Amo Pároko nia halo ita sente katak, ita hanoin tebes sira nain lima ne’ebe fó an ba rai ida ne’e. Tamba ne’e maka kada tinan sempre iha komemorasaun ba iha trajedia Balibo ne’ebe halo jornalista nain lima tenke mate, liuliu mate iha ami nia posto Balibo”, dehan Maria, iha loron Balibo Five, 16/10.

Komemorasaun Balibo Five badala 45 organiza hosi Konsellu Imprensa no Centro Nasional Chega! (CNC) no hetan apoiu hosi UNESCO.

Jornalista nain lima ne’ebe hetan tiru hosi tropas Indonesia iha Balibo mak jornalista Greg Shackleton idade 29, Tony Stewart audio man idade 21, Gary Cunningham ho idade 27, nudar cameraman for HSV-7 (Seven Network) iha Melbourne no cameraman Brian Peters idade 24 no  jornalista Malcolm Rennie idade 29, sira nain rua serbisu iha TCN-9 (Nine Network) iha Sydney.

LEAVE A REPLY

Please enter your comment!
Please enter your name here