Reportajen Fransisco JDA
Ohin Conselho Nasional Dezenvolvimentu Juventude (CNDJ) halao enkontru ba dala uluk iha SEJD, 20/10. CNDJ establese ona establese ho Dekretu Lei 32/2017 ho nia membru 18. Hosi nain 18, Feto iha nain 3.
Konfirmasaun Neon Metin halo ho Diretur Jeral Juventude no Desportu, David Tomas de Deus, liu hosi WhatsApp kona ba menus reprezentasaun feto, Diretur David hatete katak ne’e desizaun kada ministeriu nian.
“Kona ba membru ne’e SEJD so simu deit nomeiasaun husi Ministeriu no Secretaria Estado sira,” David hatan liu hosi nia WhatsApp, ohin lokraik, 20/10.
Neon Metin observa katak Sekretariu Estadu ba Egualidade no Jeneru rasik haruka nia reprezentante mane ida mak sai membru ba CNDJ.
Membru ba CNDJ período ida ne’e nian mak Abrão Nokosiku Saldanha (SEJD), David Tomas de Deus (SEJD), Mateus Lemos Soares (CNJTL), Cesário da Silva (ADTL), Maria do Céu Jorge Oliveira Gusmão (Hili hosi Gabinete Primeiru Ministru Rui Maria Araujo), João Maupelu (MEJD), Tomásia A. M. R. de Sousa (MS), Frumencio Costa Araújo de Jesus (MAP), Hélder Cosme Marçal Belo (MJ), António Viegas (MI), Armando da Costa (SEEI), Aniceto Leto Soro (SEFOPE), Aménica Machado Fernandes (SEA), Abel da Conceição (SECOMS), Emanuel A. Soares Alves (SEAC), Gil Bento (SECOOP), no João de Carvalho Fernandes (CCI-TL).
CNJD sei halao sira nia servisu too tinan 2023, hodi koordena no diriji planu no implementasaun programa sira relasiona ho dezenvolvimentu juventude. Baze legal ba establesementu CNDJ ne’e mak Konstituisaun RDTL, artigu 19, Planu Estratéjiku Dezenvolvimentu (2011-2030), no Politika Nasional Juventude. Tuir Politika Nasional Juventude CNDJ mak órgaun ida hodi fo akonsellamentu no koordenasaun ho instituisaun públika sira seluk no privadu ne’ebé maka partisipa atividade sira iha área dezemvolvimentu juventude no assume forma konabá reuniaun periódika sira. Orgaun ne’e konvokadu hosi Primeiru Ministru ka membru Governu responsável ba área juventude.
